ક્રાઇમ:વેડરોડમાં 7 વર્ષીય બાળકી સાથે પાડોશીએ અડપલા કર્યા

ચોકબજાર પોલીસ મથકની હદમાં વેડરોડમાં શ્રમજીવી પરિવારના પડોશમાં રહેતા 30 વર્ષીય બદમાશ યુવાને 7 વર્ષની બાળકી સાથે અડપલા કર્યા હતા. બદમાશ બાળકીને ચોકલેટ આપવાની લાલચ આપી પોતાના રૂમમાં બોલાવી હતી. આ ઘટનામાં પોલીસે ગુનો દાખલ કરીને બદમાશ યુવાનની ધરપકડ કરી હતી.

ચોકબજાર પોલીસના જણાવ્યા અનુસાર વેડરોડ પર શ્રમજીવી પરિવાર રહે છે. પરિવારમાં 7 વર્ષિય બાળકી મોનિકા( નામ બદલ્યું છે) પણ છે.મોનિકા જે મકાનમાં રહે છે તેના ઉપરના માળે ભાડેથી આરોપી 30 વર્ષીય રામપ્રકાશ નિષાદ રહે છે.આરોપી રામપ્રકાશ પંડોળ વિસ્તારમાં કારખાનામાં નોકરી કરે છે. રવિવારે સાંજે રામપ્રકાશે મોનિકાને ચોકલેટની લાલચ આપીને રૂમમાં બોલાવીને તેની સાથે અડપલા કર્યા હતા.

રાત્રે તો મોનિકાએ કોઈને કાંઈ ન કહ્યું પરંતુ સવારે તેને તેની માતા-પિતાને આ બાબતે જાણ કરી હતી. તેથી મોનિકાના પિતાએ ચોકબજાર પોલીસ સ્ટેશનમાં રામપ્રકાશ વિરુદ્ધ ચોકબજાર પોલીસ સ્ટેશનમાં ફરિયાદ નોંધાવી હતી. ચોકબજાર પોલીસે આરોપી રામપ્રકાશની ધરપકડ કરી છે.