અકસ્માત:રાંદેરમાં કાર ચાલકે અડફેટમાં લેતા મોપેડ સવાર 23 વર્ષીય રાજસ્થાની વેપારીનું મોત

રાંદેરમાં પેટ્રોલ પુરાવા મોપેડ લઈ નીકળેલા દુકાનદારના મોપેડને કાર ચાલકે અડફેટમાં લેતા ગંભીર રીતે ઘવાયેલા દુકાનદારનું મોત નિપજ્યું હતું. રાંદેર પોલીસે અજાણ્યા કાર ચાલક સામે ગુનો નોંધી તપાસ શરૂ કરી છે. રાંદેર દિપમાલા સોસાયટી ખાતે રહેતા અને મુળ રાજસ્થાનના વતની પૂરણ માંગીલાલ તૈલી(23) ઘર નજીક કરીયાણાની દુકાન ચલાવતા હતા. રવિવારે બપોરે તેઓ ઘરેથી પેટ્રોલ પુરાવવા માટે મોપેડ લઈ નીકળ્યા હતા. દરમિયાન રાંદેર વોકવે ગાર્ડન રોડ રાજ સાગરની આગળ ભંગારના ગોડાઉન પાસે પુરપાટ ઝડપે પસાર થતા એક કાર ચાલકે તેમને અડફેટમાં લઈ લીધા હતા.

અકસ્માત બાદ કાર ચાલક નાસી છુટ્યો હતો. અકસ્માતમાં ગંભીર રીતે ઘવાયેલા પૂરણભાઈને તાત્કાલિક સારવાર માટે ખાનગી હોસ્પિટલમાં ખસેડાયા હતા. જ્યાં ફરજ પરના તબીબે તેમને મૃત જાહેર કર્યા હતા. બનાવની જાણ થતા રાંદેર પોલીસ હોસ્પિટલ દોડી ગઈ હતી અને દુકાનદારના પિતા માંગીલાલની ફરીયાદના આધારે અજાણ્યા કાર ચાલક સામે ગુનો નોંધી વધુ તપાસ હાથ ધરી છે.