ધરપકડ:ડિંડોલીમાં બજારમાંથી ઘરેણાં ચોરી કરનાર 3 બહેન ઝડપાઈ

ડિંડોલીમાં પોલીસ સ્ટેશનની સામે આવેલી મંગળવારી બજારમાં ખરીદી કરવા માટે આવેલી મહિલા અને બાળકીના ગળામાંથી સોનાના ઘરેણાં ચોરી કરવાના બનાવમાં પોલીસે એક યુવતી અને તેની બે નાની બહેનોની અટકાયત કરી છે.સૂત્રોના જણાવ્યા અનુસાર, ડિંડોલીમાં સાંઈ રેસિડેન્સીમાં રહેતા રાજેશ્રી પાટીલ તેમની ભાભી છાયાબેન અને તેમની દીકરી નિવ્યા (દોઢ વર્ષ) સાથે મંગળવારી બજારમાં ખરીદી માટે ગઈ હતી. ત્યારે અજાણ્યા આરોપીએ નિવ્યાના ગળામાંથી સોનાનું પેન્ડલ ચોરી નાસી ગયો હતો. અન્ય બનાવમાં લક્ષ્મીનારાયણ સોસાયટીમાં રહેતી રત્ના રાજપુત ડિંડોલી પોલીસ સ્ટેશનની સામે મંગળવારી બજારમાં ખરીદી માટે ગઈ હતી.

ત્યારે અજાણ્યાએ સોનાનું પેન્ડલવાળું મંગળસુત્ર ચોરી કરી લીધું હતું. રત્ના રાજપુતે ડિંડોલી પોલીસ સ્ટેશનમાં ફરિયાદ નોંધાવી છે. પોલીસે વોચ ગોઠવીને એક યુવતી 20 વર્ષિય રાગિણી( નામ બદલ્યું છે) અને તેની બહેનો 16 વર્ષિય રીના(નામ બદલ્યું છે) તથા 15 વર્ષિય રીતા( નામ બદલ્યું છે)ની ધરપકડ કરી છે. રાગિણી બંને બંહેનો પાસે ચોરી કરાવતી હતી. ત્રણેયએ ઘણા સ્થળોએ ચોરી કરી છે. ત્રણેય બહેનો ખુબજ રીઢી હોય એવું જણાય છે. પોલીસ સખતાઈથી પૂછપરછ કરી હોવા છતાં તેઓ કાંઈ જવાબ નથી આપતી.