કોરોના ઇફેક્ટ:વેડછામાં ખોદકામ મામલે સરપંચ સામે સભ્યની કલેકટરને રજૂઆત

વેડછા ગામે તળાવમાંથી વિવાદિત જગ્યામાંથી માટી ખોદકામ નહિ કરવા બાબતે ગ્રામ પંચાયતના મહિલા સભ્ય મોહિનીબેન સુરેષભાઈ પટેલે પંચાયતના મહિલા સરપંચ અને તેમના ડેપ્યુટી સરપંચ પતિ સામે વિરોધ નોંધાવ્યો છે. અને ભૂતકાળમાં તા.26-9-2019 ના રોજ ગ્રામ સભામાં ગામ લોકોની હાજરીમાં આ બાબતે ઠરાવ કરવામાં આવ્યો હતો,આ વિવાદિત તળાવની જમીનમાં ગોવર્ધન મંદિરની સાલગીરી નિમિતે ત્રણ હજાર થી વધુ ભક્તો ભેગા મળીને મહા પ્રસાદ લે છે.

તેમજ બાજુમાં આવેલી સહકારી મંડળીનો સુવર્ણ જ્યંતી મહોત્સવ આ જગ્યા એ જ ઉજવવામાં આવે છે,તેમજ ચોમાસા પછી સૂકાના દિવસોમાં ગામના યુવાનો અને પ્રાથમિક શાળાના બાળકો અહીં રમત ગમતની પ્રવૃત્તિ કરે છે,જેથી આ વિવાદિત જગ્યા માટે અગાઉ કલેકટર કચેરી અને ગાંધીનગર ખાતે પણ વાંધા અરજી કરાઇ હતી. ગ્રામ પંચાયત તરફથી આ જગ્યામાં ખોદકામ કરવા માટે જે તે અરજી કરાઇ હોય અથવા ભવિષ્યમાં કોઈ અરજી આવે તો મહિલા સભ્ય મોહિનીબેન પટેલની વાંધા અરજીને ધ્યાને લઈને તળાવમાં માટી ખોદકામ અંગે કોઈ મંજૂરી ન આપવા માટે નવસારી જિલ્લા કલેક્ટરને લેખિતમાં રજૂઆત કરાઇ છે.