વૈશાખમાં અષાઢ:સાપુતારામાં કરા સાથે વરસાદ પડ્યો, માવઠાથી શાકભાજી, ડુંગળી અને આંબાવાડીમાં પાકને નુકસાન

ગિરિમથક સાપુતારા સહિત જિલ્લાના પૂર્વપટ્ટી વિસ્તારોમાં સોમવારે સાંજે 5 વાગ્યાના અરસામાં મોસમનો મિજાજ બદલતા આકાશમાં કાળા દિબાંગ વાદળો ઘેરાયા બાદ કડકા ભડાકા સાથે તૂટી પડેલા કરા સાથેના કમોસમી વરસાદથી સમગ્ર પંથકમાં શીતલહેર વ્યાપી ગઈ છે. ડાંગ જિલ્લામાં સાપુતારા સહિત તળેટીના જાખાના, ગલકુંડ, પાંડવા, મોરઝીરા, ડોન વિસ્તારમાં સોમવારે સાંજે 5 વાગ્યાના અરસામાં અચાનક વાતાવરણમાં પલટો આવતા આકાશમાં કાળા ડિબાંગ વાદળો ઘેરાય જતા ગાજવીજ અને બરફના કરા સાથે વરસાદ તૂટી પડતા સર્વત્ર પાણી પાણી થઈ ગયું હતું. કમોસમી વરસાદને પગલે શાકભાજી, ડુંગળી અને આંબાવાડી ધરાવતા ખેડૂતોને વ્યાપક નુકસાની થઈ હોવાનું જાણવા મળ્યું હતું. વરસાદને પગલે ગિરિમથકનું સૌંદર્ય સોળે કળાએ ખીલી ઉઠ્યું હતું.

જોકે આહવા, વઘઇ, કાલીબેલ વિસ્તાર કોરોધાકોર રહેતા વાતાવરણમાં ભેજના કારણે લોકોએ બફારાથી ત્રાહિમામ પોકારી ઉઠ્યા હતા. માવઠા બાદ સાપુતારાની ગિરિકન્દ્રામાં ઈંદ્ર ધનુસના રંગો પથરાતા નયનરમ્ય નજારો જોવા મળ્યો હતો. આ લખાય છે ત્યાં સુધી કમોસમી વરસાદને પગલે મોટી મુશ્કેલી કે જાનહાનિના અહેવાલ સાંપડી શક્યા ન હતા. શાંત પાણીમાં કરા સાથે વરસાદથી તળાવ અને આસપાસનું સૌંદર્ય સોળે કળાએ ખીલી ઊઠ્યું હતું.