ચૂંટણી જંગ:મહુવામાં વોર્ડ નંબર એકમાં બે સગા ભાઇઓ કોંગ્રેસ-ભાજપમાં સામસામે

મહુવા નગરપાલીકાની ચૂંટણીમાં નગર સેવક તરીકે ઉભા રહેલ ઉમેદવારોમાં ભાજપે 6 ગઇ ટર્મમાં જીતેલા અને 2 હારેલા ઉમેદવારોને રીપીટ કર્યા છે અને 28 ઉમેદવારો નવા છે. જયારે આ 28 પૈકી 5 ઉમેદવારો ભાજપ પરિવારના છે અને 1 ઉમેદવાર ભારાકોમાંથી ભાજપમાં પ્રવેશેલ ઉમેદવાર છે. ભારાકોએ 4 ઉમેદવારો રીપીટ કર્યા છે અને 8 નવા ઉમેદવારો મેદાનમાં ઉતાર્યા છે. જયારે મહુવા વિકાસ સમિતિ એટલેકે સમાજવાદી પાર્ટીના 24 ઉમેદવારો પૈકી કેટલાક ઉમેદવારો ભાજપા માંથી અલગ પડેલ જુથના પણ સામેલ છે.

હત્વની બાબત એ છે કે, ભારાકોનો ગઢ ગણાતા વોર્ડ નં.1માં ઉભા ઉમેદવારો સર્વાઘિક 12 છે. અને બે સગાભાઇઓ પણ ઉભા છે એક ભાઇ ભાજપમાંથી તો બીજો ભાઇ ભારાકોમાંથી.જેથી તે કુટુંબમાં બન્ને હાથમાં લાડવો જેવી સ્થિતિ સર્જાય છે. ભાજપ જીતે કે ભારાકો જીતે કુટુંબમાં નગરસેવક નક્કી અત્યારથી જ થઇ ગયા તેવી ચર્ચા આ વોર્ડમાં ચાલી રહી છે. વોર્ડ નં. 2, 6,7 અને 8 માં 8 ઉમેદવારો મેદાનમાં છે આથી ભારાકો અને વિકાસ સમિતિ સાથે ભાજપનો સિધ્ધો ટકરાવ થશે.

જયારે વોર્ડ નં. 3,4,5 અને 9 માં 9 ઉમેદવારો મેદાનમાં હોય ભારાકો અને વિકાસ સમિતિ સાથે ભાજપનો સિધ્ધો ટકરાવ થશે પરંતું આમ આદમી પાર્ટી અને અપક્ષના ઉમેદવારો જો પુરૂં જોર આપે અને નોંધપાત્ર મત મેળવે તો પેનલમાં ભંગાણ સર્જાવનો ખતરો પણ જોવાઇ રહ્યોં છે. એકંદરે મહુવા નગરપાલીકામાં 9 વોર્ડની 36 સીટ ઉપર 80 ઉમેદવારો મેદાનમાં રહ્યાં છે. જેમાં ભાજપાના 36, ભારાકોના 12, સમાજવાદીપાર્ટી(મહુવા વિકાસ સમિતિ)ના 24, આમઆદમી પાર્ટીના 5 અને અપક્ષ 3 ઉમેદવારો વચ્ચે ચૂંટણી જંગ જામશે.