દુખદ:બાઇક સ્લિપ થતા અલગઢ ગામના આધેડનું મોત થયું, પુત્રની બાઇક લઇ ખેતરે જઇ રહ્યા હતા

મહુવા તાલુકાના અલગઢ ગામે રહેતો 55 વર્ષીય આધેડ ખેતરે મોટરસાયકલ પર જઈ રહ્યો હતો તે દરમિયાન બાઇક સ્લિપ થતા માથાના તેમજ શરીરના ભાગે ગંભીર ઈજા પહોંચતા કમકમાટી ભર્યુ મોત નિપજ્યું હતુ.

અકસ્માત અંગે સૂત્રો પાસેથી મળતી વિગતો મુજબ મહુવા તાલુકાના અલગઢ ગામે પારસી ફળિયામા રેહતા મોહનભાઈ ઝીણાભાઈ માહ્યાવંશી (ઉં-55) તા-4/02/2021 ને ગુરુવારના રોજ પોતાના પુત્રની મોટરસાયકલ(GJ-05-HH-4004) લઈ ખેતરે જઈ રહ્યા હતા. તે દરમિયાન ચાલક મોહનભાઈએ પોતાના કબ્જાની બાઇક પુરપાટ ઝડપે અને ગફલતભરી રીતે હંકારી સ્ટેયરિંગ પરથી કાબૂ ગુમાવતા ગંભીર અકસ્માત સર્જાયો હતો. આ અકસ્માતમાં મોટરસાયકલ ચાલક મોહનભાઈ માહ્યાવંશી માથાના તેમજ શરીરના ભાગે ગંભીર ઘવાતા તેમનુ મોત નિપજ્યું હતુ. ઘટના અંગે મૃતકના પુત્રએ મહુવા પોલીસને જાણ કરી હતી.