જીવદયા પ્રેમીઓમાં રોષ:ભગવાનપુરા ગામની સીમમાં ટેમ્પોની અડફેટે બળદનું મોત

મહુવા અનાવલ સ્ટેટ હાઇવે પર ભગવાનપુરા ગામની સીમમાં બળદ ગાડા અને ટેમ્પા વચ્ચે ગંભીર અકસ્માત સર્જાયો હતો.જેમાં બળદનું ઘટના સ્થળે જ કરુણ મોત નીપજ્યું હતું.જે જોઈ જીવદયા પ્રેમીઓમા ટેમ્પા ચાલક વિરુદ્ધ ઉગ્ર રોષ ભભૂકી ઉઠ્યો હતો.

પ્રાપ્ત માહિતી અનુસાર મહુવા અનાવલ સ્ટેટ હાઇવે પર બુધવારે સવારે શાકભાજીનો વ્યવસાય કરતો ડુંગરી ગામનો ટેમ્પા ચાલક વાંસદા થી પરત ડુંગરી પોતાના ઘર તરફ જઈ રહ્યો હતો દરમ્યાન મહુવા તાલુકાના ભગવાનપુરા વાંક ગામની સીમમાંથી પસાર થતી વેળાએ ટેમ્પા (GJ-19-U-440)ના ચાલકે પોતાના કબ્જાનું વાહન પુરપાટ ઝડપે અને ગફલતભરી રીતે હંકારતા સ્ટેરિંગ પરથી કાબુ ગુમાવતા ભગવાનપુરા હાઈસ્કુલ નજીક સુગરના બળદ ગાડાને અડફેટે લઈ ગંભીર અકસ્માત સર્જ્યો હતો.આ અકસ્માતમાં બળદનુ ઘટના સ્થળે જ કમકમાટી ભર્યુ મોત નિપજ્યું હતુ.ઘટના અંગે સુગર ફેકટરીના જવાબદારોને જાણ થતા ત્વરિત ઘટના સ્થળે દોડી આવી આગળની કાયદેસરની કાર્યવાહી હાથ ધરી હતી.

અકસ્માતમાં નિર્દોષ મૂંગા જીવ મૃત હાલતમાં જોઈ જીવદયા પ્રેમીઓમાં ટેમ્પા ચાલક વિરુદ્ધ ભારે રોષ ભભૂકી ઉઠ્યો હતો.તો બીજી બાજુ બળદનું મૃત્યુ થતા ગરીબ મજૂર પરિવાર પણ મુશ્કેલીમા મુકાઈ ગયો હતો.