ધરપકડ:કોસંબાના જ્વેલર્સમાં 6 કરોડની લૂંટનો આરોપી 11 વર્ષ બાદ પકડાયો

માંગરોળ તાલુકાના કોસંબા તરસાડીના કે. એમ. ચોક્સી જ્વેલર્સમાં 2010માં 6 કરોડના સોના-ચાંદીના દાગીના તથા રોકડની લૂંટ થઈ હતી. આ લૂંટની ઘટનાનો 11 વર્ષથી નાસતો ફરતો મોસ્ટ વોન્ટેડની ટોપ-10માં સામેલ એવો ખુંખાર ધાડપાડુ સુરત એલસીબીએ ઝડપી પાડ્યો હતો.

કોસંબા તરસાડીમાં કે. એમ. જ્વેલર્સ પેઢીમાં 15થી 20 કરતાં વધુ લૂંટારુઓ હથિયાર સાથે પ્રવેશી સોના -ચાંદી રોકડ સહિત 6 કરોડથી વધુના મુદ્દામાલની લૂંટ કરી હતી. આ લૂંટ સંદર્ભે જે તે વખતે એલસીબીએ ગુનામાં સામેલ મધ્યપ્રદેશ જાંબુઆ ગેંગના સભ્યોને ઝડપી પાડ્યા હતાં. મુખ્ય સુત્રધાર મુળ પાકિસ્તાનના રહેવાસીને એટીએસએ ઝડપી પાડ્યો હતો. ઘટનામાં મુખ્ય ભૂમિકા ભજવનાર મુકેશ ઉર્ફે વિશાલ રત્ના બારિયા 11 વર્ષથી નાસતો ફરતો હતો.

આરોપીને ઝડપી પાડવા એલસીબી પીએસઆઈ પી. સી. સરવૈયા તથા એલસીબીની ટીમ બનાવી જાંબુઆ તપાસ કરી હતી. જ્યાં આરોપી કામ માટે ગુજરાતમાં ચોરી છુપીથી રહેતો હોવાનું જાણવા મળેલ હતું. જેથી એલસીબીના પોલીસ કોન્સ્ટેબલ દીપક કાર્તિકગીરી, ચેતનગીરી, વિક્રમભાઈને બાતમી મળી હતી કે લૂંટમાં સંડોવાયેલો મુકેશ બારિયા આણંદના વાસદમાં રેલવે સ્ટેશનની બાજુમાં ઝુપડપટ્ટીમાં રહી મજૂરી કરે છે. બાતમીને આધારે પોલીસે સ્થળ પર પહોંચી તેને દબોચી લીધો હતો. ઝડપી પાડી પોલીસે તેની ઉલટ તપાસ કરતાં 2010માં તેણે કે. એમ. ચોક્સી કોસંબા ખાતે લૂંટ કરી હોવાનું કબૂલાત કરી હતી.

નહારિયા ગેંગ મજૂરી કરી જગ્યાની રેકી કરે છે
કે. એમ. ચોક્સી જ્વેલર્સમાં લૂંટ કરનાર મધ્યપ્રદેશના જાંબુઆ વિસ્તારની નહારિયા ગેંગ તરીકે પ્રચલિત છે. મુકેશ પણ ગેંગનો સાગરીત છે. આ ગેંગના માણસો ગુજરાતમાં અલગ અલગ જગ્યાએ મજૂરી કામ કરતાં હોય છે. તે દરમિયાન ચોરી અને લૂંટ કરવા માટેની જગ્યાની રેકી કરી લૂંટને હથિયારો વડે અંજામ આપતા હોય છે.

હથિયાર અને ચોરીના ગુનામાં પકડાયો હતો
મુકેશ કોસંબાની લૂંટની ઘટના બાદ ગુજરાતના અન્ય વિસ્તારમાં નાસતો ફરતો હતો. ચોરી છુપીથી વસવાટ કરતો હતો. દરમિયાન તેણે ગેરકાયદે હથિયાર રાખવાના ગુનામાં જાંબુઆ ક્ષેત્રમાં પકડાયો હતો. તેમજ ગોધરા વિસ્તારમાં ચોરી પણ કરી હોય તેમાં પણ તે વોન્ટેડ હતો.