તસ્કરી:સરનામું પુછવાના બહાને સેલ્સમેનની બાઇક અટકાવી 5 લાખની ચિલઝડપ

માંગરોળ તાલુકાના પાલોદ ગામની હદમાં આવેલ કીમ ચાર રસ્તા વિસ્તારમાં ભરબપોરે કીમ ચાર રસ્તા ઓવરબ્રિજના પાલોદ ગામ તરફના છેડા પાસે બેંકમાં ઓફિસના રૂપિયા ભરવા જઈ રહેલા સેલ્સમેનને બાઈક પર આવેલા બે અજાણ્યા ઈસમોએ ધક્કો મારી 5 લાખ રૂપિયા ભરેલ બેગ લઇને ભાગી છૂટ્યા હતાં. ઘટનાની જાણ થતાં કોસંબા પોલીસ ઘટના સ્થળે પહોંચી છે.

કીમ ચાર રસ્તા પાસે પાલોદ ગામની સીમમાં ઓવરબ્રિજ પાસે આવેલા કોકો કોલા કંપનીના રાધે ડિસ્ટ્રીબ્યુટરના સેલ્સમેન અખિલેશ દુબે બાઇક નં (GJ-05HH-1444) લઈને પોતાની દુકાનની અંદર અંદાજિત 5 લાખ કેશ એક બેગમાં ભરી એક્સીસ બેંકમાં જમા કરાવવા માટે જઈ રહ્યો હતો ત્યારે એક નંબર વગરની બાઇક પર આવેલા બે અજાણ્યા ઈસમોએ સરનામું પુછવાને બહાને અખિલેશની બાઈક રોકાવી ધક્કો મારી તેની પાસેથી બેગ છીનવી કીમ ચાર રસ્તા ઓવરબ્રિજ સુરત તરફ બ્રિજની ઉપરથી બાઈક લઈને ભાગી છૂટ્યા હતાં. ઘટનાની જાણ થતાં કોસંબા પોલીસ સહિત ઉચ્ચ અધિકારીનો કાફલો ઘટના સ્થળે પહોંચ્યો હતો. પોલીસે ઘટના સંદર્ભે ભોગ બનનારની ફરિયાદ લેવાની તજવીજ હાથ ધરી છે.

રેકી કરી ઘટનાને અંજામ અપાયાની શક્યતા
5 લાખની ચીલ ઝડપ સંદર્ભે અખિલેશ દુબે નિયમિત રૂપે પોતાની ડિસ્ટ્રીબ્યુટરની દુકાનમાંથી જમા થયેલ કેશ લઈને બેંકમાં જમા કરાવવા જતો હતો. અખિલેશ પાસે કેશ મોટા પ્રમાણમાં હોવાની જાણ કોઈ જાણભેદુ પાસે હોય અથવા અખિલેશની કોઈએ લૂંટના ઈરાદે રેકી કરી આ ઘટનાને અંજામ આપ્યો હોવાનું શક્યતાને નકારી શકાતી નથી. ઉપરાંત કોસંબા પંથકમાં ગત 2 માસમાં થયેલી લૂંટમાં પણ આ જ ટોળકી સંડોવાયેલી હોવાની શક્યતા હોવાનું નકારી શકાય તેમ નથી.