બેન્ક કર્મચારીની પ્રમાણિકતા:બેંકના કેશિયરે 2 ગ્રાહકોના વધારાના 60 હજાર પરત કર્યા

ધી સુરત ડિસ્ટ્રીક્ટ કો. ઓ. બેંક, બમરોલી-સુરત બ્રાન્ચમાં ફરજ બજાવતા બેંકના કેશીયર દ્વિજેશ પટેલે સુમુલ ડેરીના ડેઇલી પૈસા ભરવા આવેલા એજન્ટે ભુલથી રૂા.50,000ની ચલણી નોટ વધુ આપેલ રૂા.500નું બંડલ પરત કર્યું હતું.બેંકમાં પૈસા ભરવા આવેલા એક વેપારીએ પણ ભુલથી આપેલ 10 હજારની રકમ પણ પરત કરી પ્રમાણિકતાના દર્શન કરાવ્યા હતા.

ઓલપાડ તાલુકાના સાંધીએર ગામના વતની અને હાલ સુરત ખાતે રહેતા દ્વિજેશ ઠાકોરભાઇ પટેલ બમરોલીની સુરત ડિસ્ટ્રિક્ટ બ્રાન્ચમાં કેશીયર તરીકે ફરજ બજાવે છે.તેમની ફરજ દરમ્યાન સુમુલ ડેરીમાં ડેઇલી પૈસા ભરવા આવેલા એજન્ટને જ્યારે બેંકમાં પૈસા ભરવા આવ્યા, ત્યારે ગ્રાહકોની લાંબી લાઇન નિહાળી કેશીયરને રૂા. 3 લાખની બેંક સ્લીપ અને રૂપિયા આપી તેના ખાતામાં જમા કરવાનું કહી જતા રહ્યા હતા. જ્યારે ગ્રાહકો ઓછા થતા બેંક કેશીયર દ્વિજેશ પટેલે તેના ખાતામાં પૈસા જમા કરાવવા રૂપિયા ગણ્યા,ત્યારે રૂા.50,000 રકમનું રૂા.500ની ચલણી નોટનું બંડલ વધારાનું જણાતા કલ્પેશ તંબોલીને બોલાવી વધારાની રૂા.50,000ની રકમ પરત કરી હતી. જ્યારે કેશીયરની ઇમાનદારીથી પ્રભાવિત થયેલા સુમુલ એજન્ટની આંખમાંથી ખુશીના આંશુ છલકાઈ ઉઠ્યા હતા.

જે બાદ બમરોલી બ્રાન્ચ મેનેજરને કેશીયર દ્વિજેશ પટેલને ઇમાનદારી બદલ અભિનંદન પ્રમાણપત્ર આપવા પત્ર આપ્યો હતો. જ્યારે ઉપરોકત એક અન્ય વેપારી ખાતેદાર બી.કે.પ્રજાપતિ પણ બેંકમાં લાંબી કતાર નિહાળી તેના ખાતામાં રૂા.50,000 જમા કરાવવા જુદી-જુદી ચલણી નોટના બંડલો અને સ્લીપ આપી જતા રહ્યા હતા. આ ખાતેદારના પણ ભુલથી રૂા.10,000 વધુ હોવાથી તેને પણ કેશિયરે રૂબરૂ બોલાવી આ રકમ પરત કરી પ્રામાણિકતાનું ઉત્તમ ઉદાહરણ પૂરું પાડ્યું હતું.