કાર્યવાહી:વીજ મીટર સાથે ચેડા પ્રકરણમાં મિલમાલિકના આગોતરા નામંજૂર

કુંવરદામાં સ્ટાર પ્રોફાઈલ ફેક્ટરીમાં વીજચોરી બાબતે કોસંબા પોલીસમાં વીજકંપનીના ડે. ઈજનેરે ફરિયાદ કરી હતી. કોસંબા પોલીસે કંપની સાથે ભેગા મળીને પેન્ડિંગ યુનિટ રાખી વીજ ચોરીના કૌંભાડમાં મીટર રીડરની ધરપકડ કરી તપાસ હાથ ધરી હતી. સ્ટાર પ્રોફોઈલના માલિકે આગોતરા કરી હતી, જેની સુનાવણીમાં પીપી પરડીવાલાએ રજૂઆત કરતા નામંજૂર થઇ હતી.

દ. ગુજરાત વીજ કંપનીની વિજિલન્સ ટીમે 27 જુલાઈએ કુંવરદા ગામે સ્ટાર પ્રોફાઈલ કંપનીમાં વીજ ચેકિંગ દરમિયાન 47000થી વધુ પેન્ડિંગ યુનિટ ઝડપી પાડ્યા હતાં. જિલ્લામાં અનેક જગ્યાએ પેન્ડિંગ યુનિટ અને મીટર બગડેલા મળતાં ફેક્ટરી માલિકો અને મીટર રીડરો ભેગા મળી યુનિટ પેન્ડિંગ રાખી વધુ પ્રમાણમાં યુનિટ ભેગા થયા બાદ મીટરને ક્ષતિગ્રસ્ત કરી વીજ ચોરી થતી હોવાની ગંધ વિજિલન્સ ટીમને આવી હતી. જેમાં મીટર રીડરોની શંકાસ્પદ ભૂમિકા હોવાનો ખુલાસો થયો હતો. મીટર રીડરોએ ફેક્ટરી માલિકો પાસેથી રૂપિયા લઈને યુનિટ પેન્ડિગ રાખતા હોવાની કબૂલાત કરી હતી, જેને આધારે કોસંબા સબ ડિવિઝનના ડે. ઈજનેર પી. કે. ચૌધરી દ્વારા કોસંબા પોલીસમાં ફરિયાદ કરી હતી. જેમાં સ્ટાર પ્રોફાઈલ સંચાલક જે. કે. કીકાણીએ મીટર રીડર અશોક પરમાર, પરેશ પરમાર અને શાહીદ મીર્ઝા સામે ગુનો નોંધાયો હતો. પોલીસે અશોક પરમારની ધરપકડ કરી હતી. સ્ટાર પ્રોફાઈલના સંચાલક જે. કે. કીકાણીએ આગોતરા જામીન અરજી કરી હતી. જે નામંજૂર થઇ હતી.