ભાસ્કર વિશેષ:બારડોલી રહેતા પિતા-પુત્રીની જિલ્લા કક્ષાના કલા મહાકુંભમાં અનોખી સિદ્ધિ

બારડોલી13 દિવસ પહેલા
  • કૉપી લિંક
  • તાલુકાકક્ષાએ પ્રથમ બાદ જિલ્લાકક્ષાએ દ્રિતીયક્રમ

બારડોલીમાં યોજાયેલા સુરત જિલ્લાકક્ષાના કલા મહાકુંભમાં બારડોલીના પિતા પુત્રીએ અનોખી સિદ્ધિ પ્રાપ્ત કરી હતી. 7 વર્ષની પુત્રીએ લોકગીત- ભજન વિભાગમાં દ્વિતીય ક્રમ અને પિતાએ પણ આ જ વિભાગમાં દ્વિતીય ક્રમ પ્રાપ્ત કરી બારડોલી વિસ્તારનું ગૌરવ વધાર્યું છે.

મૂળ માંડવી તાલુકાના ગોદાવાડી ગામના અને હાલ બારડોલી સરદાર વિલા સોસાયટીમાં રહેતા રજનીભાઈ રમેશભાઈ પટેલ પલસાણા તાલુકામાં CRC તરીકે નોકરી કરે છે. જ્યારે તેમની પત્ની ઝરણામતી ગામીત પલસાણા તાલુકાની કણાવ પ્રાથમિક શાળા શિક્ષિકા તરીકે ફરજ બજાવે છે. તેમની સાત વર્ષની પુત્રી કાવ્યા માતાની શાળામાં અભ્યાસ કરે છે. તેમનો પરિવાર શરૂઆતથી સંગીત સાથે જોડાયેલો હોય, તેની અસર તેમની દીકરી પર પણ જોવા મળી રહી છે. હાલમાં ચાલી રહેલા કલા મહાકુંભ દીકરી કાવ્યાએ લોકગીત-ભજન વિભાગ (6થી14 વર્ષ)માં પલસાણા તાલુકા કક્ષાએ પ્રથમ ક્રમ પ્રાપ્ત કર્યો હતો.

જ્યારે રજનીભાઈએ પણ 21થી 59 વર્ષની કેટેગરીમાં પ્રથમ ક્રમ પ્રાપ્ત કરતા બંને જિલ્લા કક્ષાએ પલસાણા તાલુકાનું પ્રતિનિધિત્વ કર્યું હતું. શનિવારના રોજ બારડોલી તાલુકાની અસ્તાન કન્યા વિદ્યાલય ખાતે જિલ્લા કક્ષાના કલા મહાકુંભમાં પિતા અને પુત્રીએ પોતાની કૃતિ રજૂ કરી હતી. જેમાં બંનેએ પોતપોતાની કેટેગરીમાં દ્વિતીય ક્રમ પ્રાપ્ત કર્યો હતો. તેમની આ સિધ્ધિમાં કાવ્યાની માતાએ હાર્મોનિયમ વગાડી મહત્વપૂર્ણ યોગદાન આપ્યું હતું. પિતા પુત્રીએ કલા મહાકુંભમાં ઉત્કૃષ્ટ પ્રદર્શન કરતા પલસાણા, બારડોલી અને માંડવી તાલુકા નું ગૌરવ વધાર્યું હતું. આ ઉપરાંત કલા મહાકુંભમાં પલસાણા અને કણાવ પ્રાથમિક શાળાના કલાવૃંદ ક્રિષ્ના દેસાઈ, (સહાયકો- ઝરણામતિ ગામીત, રાધાબેન પટેલ, છયાબેન પટેલ, અને રજનીભાઈ પટેલ)એ લગ્ન ગીત વિભાગમાં પણ પ્રથમ ક્રમ પ્રાપ્ત કર્યો હતો.

અન્ય સમાચારો પણ છે...