ત્રિપલ મર્ડર કેસના રુવાંટાં ઊભાં કરી દેતાં દૃશ્યો:પહેલાં પિતા-પુત્રને કુહાડીથી મોતને ઘાટ ઉતાર્યા, બાદમાં મૃતકના ભાઈએ હત્યારાને ત્યાં ને ત્યાં જ પતાવી દીધો

દિવસે ને દિવસે હત્યાના બનાવો ખૂબ વધી રહ્યા છે. જ્યાં કોઈ અગાઉનો ખાર રાખીને કોઈની હત્યાનું ષડ્યંત્ર રચીને ઘટનાને અંજામ આપે છે. તો કોઈ ઘટનામાં પરિવારના કોઈ અંગત પોતાના માટે જીવલેણ સાબિત થાય છે. ત્યારે આવી જ એક ઘટના પોશીનામાંથી સામે આવી છે. જ્યાં એક, બે નહીં પરંતુ ત્રિપલ મર્ડરનો બનાવ બનવા પામ્યો છે. જ્યાં એક ઘરમાંથી પહેલાં ચીસોના અવાજ આવવાના શરૂ થયા ત્યારબાદ જાણે ઘરમાં લોહીની પિચકારીઓ ઊડતી હોય તેવાં દૃશ્યો સર્જાયાં અને અંતે 3 જણાં મોતને ભેટી ગયાં. જાણો રાતના અંધારામાં કઈ રીતે ખેલાયો હતો ખૂની ખેલ?, કોણ હતો હુમલાખોર અને કોણ બન્યું આ ત્રિપલ મર્ડરનો શિકાર?....

સપનામાં પણ નહીં વિચાર્યું હોય તેવી ઘટના બની
વાત છે, સાબરકાંઠા જિલ્લાના પોશીના તાલુકાથી પાંચ કિમી દૂર આવેલા એક નાનકડા એવા ગામ અજાવાસની. જ્યાં રહેતા લલ્લુ ગમાર ખેતીકામ કરીને પોતાના પરિવારનું ગુજરાન ચલાવતા હતા. જ્યાં તેમના પરિવારમાં તેમની પત્ની, પાંચ છોકરા અને એક છોકરી રહે છે. ત્યારે બુધવારની એ રાતે કંઈક એવી ઘટના બનવા પામી હતી, જે લલ્લુભાઈનો પરિવાર આજીવન નહીં ભૂલે. તેમના પરિવારે સપનામાં પણ નહીં વિચાર્યું હોય તેવી ઘટના તે રાત્રિએ બની હતી. જેણે પરિવાર સહિત આજુબાજુમાં રહેતા લોકોની ઊંઘ ઉડાડી દીધી છે.

ત્રણેય જણાં બહાર ખાટલો નાખીને સૂઈ ગયા હતા
બુધવારની રાત્રિએ લગભગ રાતના 10 વાગ્યા હશે ને લલ્લુ ગમારને ત્યાં અજાવાસથી ચાર કિમી દૂર આવેલા જીજણાટ ગામે રહેતા રમેશ બોબડિયા જે લલ્લુભાઈની બહેનના દિયર થાય છે તેઓ આવ્યા હતા. ત્યારે લલ્લુભાઈ અને તેમના પરિવારે તેમની સાથે રાતનું ભોજન લઈને સૌએ સૂવાની તૈયારી શરૂ કરી હતી. રમેશ 4 કિમી દૂરથી આવ્યો હોવાથી. તેણે પણ ત્યાં જ રાત રોકાવાનું નક્કી કર્યું હતું. ત્યારે લલ્લુભાઈની પત્ની અને તેમના ચાર છોકરા અને એક છોકરી ઘરની અંદર સૂઈ ગયાં હતાં. જ્યારે લલ્લુભાઈ તેમનો 6 વર્ષનો પુત્ર કલ્પેશ અને લલ્લુભાઈના બહેનના દિયર ત્રણેય જણા બહાર ખાટલો નાખીને સૂઈ ગયા હતા.

અચાનક તેઓ ઊભા થયા ને હાથમાં કુહાડી પકડી
તે દરમિયાન રાતના એક વાગ્યાની આસપાસ અચાનક ચીસોના અવાજ આવવાના શરૂ થયા. સાથે જાણે લોહીની પિચકારીઓ ઊડી રહી હોય તેવાં દૃશ્યો સર્જાયાં હતાં. રાત્રિના રમેશ બોબડિયા અચાનક ઊભા થયા અને તેમણે ઘરની બહાર પડેલી કુહાડી હાથમાં ઉઠાવી અને લલ્લુભાઈ ઉંઘમાં હતા અને તે કંઈ સમજે તે પહેલાં જ તેમના પર કુહાડી વડે હુમલો કરી દીધો. ત્યાં તેમની બાજુમાં જ 6 વર્ષીય કલ્પેશ સૂઈ રહ્યો હતો. જેવી કુહાડી વડે તેના પિતા પર હુમલો થયો એટલે તુરંત જ તે જાગી ગયો અને જોયું તો રમેશભાઈના હાથમાં કુહાડી હતી. જ્યાં બાજુમાં તેના પિતા લોહીથી લતપત મૃત અવસ્થામાં પડેલા હતા. ત્યાં જ રમેશ બોબડિયાએ બીજો હુમલો કર્યો ને પિતાને આ અવસ્થામાં જોઈ રહેલા પુત્ર પર પણ હુમલો કરી મોતને ઘાટ ઉતારી દીધો.

આવીને જોયું ત્યાં તો ઘણું મોડું થઈ ગયું હતું
તે રાત્રિએ જાણે રમેશ બોબડિયા પર ખૂન સવાર થયું હોય તેમ તેણે એકસાથે બે લોકોને મોતને ઘાટ ઉતારી દીધા હતા. ત્યાં કલ્પેશને કુહાડી વાગતા સમયે તે ચીસ પાડી ગયો હતો. જે ચીસ સાંભળી તેની માતાની ઊંઘ ઊડી ગઈ હતી. ત્યારે રાત્રિના અચાનક પોતાના પુત્રની ચીસ સાંભળી માતાએ ઘરનો દરવાજો ખોલી બહાર આવીને જોયું ત્યાં તો ઘણું મોડું થઈ ગયું હતું. તેમના પતિ અને તેમનો 6 વર્ષીય દીકરો કલ્પેશ લોહીની લાલ ચાદરમાં લપેટાઈને પડ્યા હતા અને બીજા દૃશ્યમાં તેમની સામે કુહાડી લઈને ઊભા હતા રમેશ બોબડિયા. જેના માથે 2 હત્યા કર્યા બાદ પણ ખૂન સવાર હોય તેમ તેણે લલ્લુભાઈની પત્નીને જોઇ અને ત્રીજી હત્યા કરવાના ઈરાદે તેમની સામે કુહાડી લઈને આગળ વધ્યો...

દરવાજા પર લાગેલા તાળા પર કુહાડી વાગીને નીચે પડી ગઈ
તે જોઈ અચાનક લલ્લુભાઈની પત્ની જોરથી ચીસ પાડી ઊઠી. જેથી ઘરમાં સૂતેલા તેમના અન્ય છોકરાઓ પણ આ ચીસ સાંભળી બહાર આવ્યા ને આ નજારો જોઈ થંભી ગયા. ત્યાં તો રમેશ કુહાડી લઈને લલ્લુભાઈની પત્ની સુધી પહોંચી ગયો ને કુહાડીનો હુમલો કરતા કુહાડીથી બચવા તેણીએ દરવાજો આડો કરતા દરવાજાના તાળા પર કુહાડી વાગીને નીચે પડી ગઈ. ત્યાં તરત જ તે સમયનો લાભ લઈ લલ્લુભાઈની પત્ની અને તેમના છોકરા અને છોકરી જીવ બચાવી બહાર નીકળી ગયાં હતાં અને બૂમાબૂમ કરતાં આસપાસના લોકો દોડી આવ્યા હતા. ત્યાં જોડે લલ્લુભાઈના ભાઈ પણ બાજુમાં જ રહેતા હોવાથી તેઓ પણ ચીસો સાંભળી દોડી આવ્યા હતા.

મૃતકના ભાઈ પણ ગંભીર રીતે ઈજાગ્રસ્ત થયા
મૃતક લલ્લુભાઈના ભાઈ મકનાભાઈ ચીસો સાંભળીને ઘરે આવ્યા ને ત્યાં ઘરના ઉપરથી પતરું ખોલીને અંદર જતા જ સામે રમેશ કુહાડી લઈને ઊભો દેખાયો હતો. તેણે મકનાભાઈને ઘરની અંદર પ્રવેશતા જોઈ તેમના પર પણ કુહાડી વડે જીવલેણ હુમલો કરી દીધો. જ્યાં મકનાભાઈ સાઈડમાં ખસી જતાં બચી ગયા હતા. બાદમાં તેમણે પોતાને રમેશ અને કુહાડીથી બચાવા રમેશ ઉપર જ હુમલો કરી દીધો અને બંને જણાં એકબીજા સામે આવી ગયા. જ્યાં ઝપાઝપી કરતા સમયે જ અચાનક મકનાભાઈએ જોરદાર હુમલો કરતાં હુમલામાં રમેશભાઈની હત્યા થઈ ગઈ હતી. જ્યારે મકનાભાઈને શરીરે ગંભીર ઈજાઓ થઇ હતી. આ બનાવ અંગે પોશીના પોલીસને જાણ થતાં વહેલી સવારે 4 વાગે પોલીસ ઘટનાસ્થળે પહોંચી હતી. ત્યારબાદ જિલ્લા પોલીસ વડા સહિત ઉચ્ચ અધિકારીઓ પણ ઘટનાસ્થળે પહોંચ્યા હતા અને સ્થળનું નિરીક્ષણ કર્યું હતું. ત્યારબાદ પોલીસે ફરિયાદ નોંધવાની તજવીજ હાથ ઘરી અને ઘટનાની આગળની કાર્યવાહી હાથ ધરી હતી.

SP સહિતનો પોલીસ કાફલો અજાવાસ ગામે પહોંચ્યો
આ ખૂની ખેલની ઘટના અંગે જિલ્લા પોલીસ વડા વિશાલ વાધેલાએ જણાવ્યું હતું કે, પોશીનાના અજાવાસ ગામમાં રહેતા લલ્લુભાઈ એમનો દીકરો કલ્પેશ ઝીંઝરાટ ગામના રમેશભાઈ એમ કુલ ત્રણના મોત નીપજ્યા છે. લલ્લુભાઈના બનેવીના ભાઈ રમેશભાઈ ઝીંઝરાટ ગામથી ગઈકાલે અજાવાસ ગામે આવેલા હતા અને રાત્રે રોકાયેલા હતા. રાત્રી દરમિયાન રમેશભાઈ તીક્ષ્ણ હથીયાર વડે લલ્લુભાઈ ઉપર હુમલો કર્યો અને તેમના સાથે સુતેલા 5 વર્ષના દીકરા કલ્પેશ ઉપર પણ હુમલો કરી મોતને ઘાટ ઉતાર્યા હતા. તેવામાં લલ્લુભાઈના પત્ની તરુંત બહાર નીકળી લલ્લુભાઈના ભાઈને બોલાવ્યા હતા. ઘટનામાં હુમલો કરનાર રમેશનું પણ મોત નીપજ્યું હતુ. આ બાબતે પોશીના પોલીસ સ્ટેશનની ટીમ ઘટના સ્થળે પહોંચી આગળની કાયદેસરની કાર્યવાહી હાથ ધરી છે.