ઈડરના ખેડૂતનું ગજબ સાહસ:યુ-ટ્યૂબ પરથી સ્ટ્રોબેરીની ખેતી કરતા શીખ્યો ને 90 દિવસમાં લાખોની કમાણી કરી; વેપારીઓ સામેથી ખરીદી કરવા આવ્યા

સ્ટ્રોબેરીનું નામ સાંભળતાં જ મોઢામાં પાણી આવી જાય, જો એ જ સ્ટ્રોબેરી ઘરઆંગણેથી જ મળી રહે તો? જી હા... વાત છે સાબરકાંઠા જિલ્લાના ઈડર તાલુકાના નવા રેવાસના એક પ્રગતિશીલ ખેડૂત ભરતભાઈ પટેલની, જેમણે ઠંડા પ્રદેશમાં થતા પાકનું ગરમ પ્રદેશમાં વાવેતર કરી માત્ર ત્રણ મહિનામાં 1.5 લાખ જેટલી આવક મેળવી છે. સ્ટ્રોબેરી તો ઠીક, સાથે સાથે વચ્ચે રહેલી ખાલી જગ્યામાં શિમલા મિર્ચ અને ધાણા પણ વાવ્યાં છે, એટલે કહી શકાય કે ખેડૂતે પોતાની સૂઝબૂઝ વાપરી આ ખેતી થકી મબલખ ઉત્પાદન મેળવ્યું છે. ભરતભાઈ પટેલે પોતાના ખેતરમાં આઠ ગુંઠામાં આચ્છાદન અને ડ્રિપ પદ્ધતિ થકી સફળ ખેતી કરીને અન્ય ખેડૂતો માટે પણ પ્રેરણારૂપ બન્યા છે. તો આવો... જાણીએ ખેડૂતે કરેલી સફળ ખેતી વિશે...

ખેડૂતે 3500 છોડ વાવી નવી શરૂઆત કરી
યુ-ટ્યૂબ પર સર્ચ કરી છોડ ક્યાંથી મેળવી શકાશે, કેવી રીતે એની ખેતી થઈ શકે, વગેરે માહિતી મેળવી તેમણે આ ખેતીની શરૂઆત કરી છે. ભરતભાઈએ જણાવ્યું હતું કે તેમણે આ સ્ટ્રોબેરીના છોડ પુણે-મહાબળેશ્વરથી મગાવ્યા હતા. એક છોડની કિંમત રૂ. 10 અને મગાવવાના ભાડા સહિત રૂ. 14 જેવો ખર્ચ થયો હતો. તેમના ખેતરમાં હાલમાં 3500 છોડ છે.

સીઝન પૂરી થશે તોય શિમલા મિર્ચ થકી આવક ચાલુ રહેશે
તેઓ આ સ્ટ્રોબેરીની ખેતી સાથે શિમલા મિર્ચ અને ધાણાની પણ ખેતી કરી રહ્યા છે, જેમાં શિમલા મિર્ચનું ઉત્પાદન અત્યારસુધીમાં 50 મણ જેટલું થયું છે. આની સાથે વચ્ચે રહેલી જગ્યામાં તેમણે ધાણા પણ વાવ્યા છે, એટલે કે સ્ટ્રોબેરીની સાથે અન્ય ખેતી થકી પણ તેઓ કમાણી કરી રહ્યા છે. ગરમીની સીઝનમાં સ્ટ્રોબેરી બંધ થતી હોવાથી એ પછી પણ તેમની આવક શિમલા મિર્ચ થકી ચાલુ રહેશે.

ઘરઆંગણે જ વેચાણ કરી સીધો નફો મેળવે છે
સ્ટ્રોબેરીએ ઠંડા પ્રદેશમાં થતી ખેતી છે. પ્રથમ વખત સફળતાપૂર્વક વાવેતર કરી સારું ઉત્પાદન મેળવી રહ્યા છે. સ્ટ્રોબેરીમાં આચ્છાદન અને ડ્રિપ પદ્ધતિ થકી પ્રયોગ માટે આઠ ગુંઠામાં આ સ્ટ્રોબેરીની ખેતી કરી છે. આ સ્ટ્રોબેરીની સાથે તેમણે સાથે શિમલા મિર્ચ અને ધાણા પણ વાવ્યાં છે. અત્યારે રોજની રૂ. 3 હજારથી 3500 સુધીની આવક મેળવી રહ્યા છે. સ્ટ્રોબેરીને તેઓ પોતાના ઘરેથી જ રૂ. 40 પ્રતિ 200 ગ્રામના પેકેટમાં વેચાણ કરે છે, એટલે કે રૂ. 200 પ્રતિ કિલો એનું વેચાણ થાય છે. સીધા વેચાણ થકી તેમને સારો નફો મળી રહ્યો છે.

હજી 60 હજાર બીજી આવકની શક્યતા
આવતા વર્ષે ભરતભાઇ વધુ 10,000 છોડ મગાવી આ ખેતીને વિસ્તારવા વિચારી રહ્યા છે. તો આઠ ગુંઠા થકી તેમની દોઢ લાખ જેટલી આવક મેળવી અને 30 માર્ચ સુધી તેમની સ્ટ્રોબેરીના ફળ ચાલુ રહેશે. ગરમીના લીધે ઉત્પાદન ઘટે તોપણ રોજના 2000 લેખે ગણીએ તો બીજા 60 હજાર જેવી આવક થવાની શક્યતા છે.

વેપારી 100ના ભાવે માગે છતાંય નથી આપતા
આમ જોઈએ તો આઠ ગુંઠામાંથી બે લાખથી વધુની આવક, શિમલા મિર્ચ અને ધાણા થકી પણ તેમને સારીએવી આવક મળી શકે એમ છે. સ્ટ્રોબેરીની ખેતી ફાયદાકારક ખેતી છે. હાલમાં તેમની પાસે વેપારી 100 રૂપિયા હોલસેલ ભાવે માગવા આવે છે, પરંતુ તેમની પાસે મર્યાદિત જથ્થો હોવાથી તેઓ જાતે જ તેનું વેચાણ કરી નફો મેળવે છે.