વિવાદ:રાજ્યના શિક્ષણ ક્ષેત્રમાં વર્ષ 2021માં લાંચનો પ્રથમ કિસ્સો

નર્મદા જિલ્લા પ્રયોજના વહીવટદાર હેઠળ ચાલતી એકલવ્ય મોડેલ સ્કૂલોમાં વિદ્યાર્થીઓના ભોજનથી લઈને અન્ય સમાન પૂરું પાડવા કોન્ટ્રેક્ટરો નીમવામાં આવે છે. ત્યારે ડેડિયાપાડા એકલવ્ય મોડેલ ડે સ્કૂલના આચાર્ય કિશોર ખેંગાર સોલંકીએ ધોરણ 11ના વિદ્યાર્થીઓના જમવાનું જે બિલ થાય તે પોતાને સોંપી દેવા કોન્ટ્રાક્ટર પાસે રૂા.50 હજારની લાંચ માંગી હતી. જેની કોન્ટ્રેક્ટર સહયોગી ડેડીયાપડાના ભરત વણકરે રાજપીપલા એસીબીમાં ફરિયાદ કરી હતી.

નર્મદા એસીબી પી.આઈ બી.ડી.રાઠવાએ તપાસ હાથ ધરી આચાર્ય કિશોર ખેંગાર સોલંકીની ડેડિયાપાડા મોડેલ સ્કૂલના કમ્પાઉન્ડમાંથી ધરપકડ કરી હતી. તેને સ્પેશિયલ સેસન્સ કોર્ટમાં રજુ કરતા જજ પીએન ચૌધરીને સરકારી વકીલ જે.જે.ગોહિલ જરૂરી દલીલ કરતા કોર્ટે એક દિવસના રિમાન્ડ મજુર કર્યા છે. આ રિમાન્ડમાં અન્ય અધિકારીઓના નામોની માહિતી અપાશે તો મોટું કૌભાંડ બહાર આવે તેમ છે.સંબંધિત અધિકારીઓમાં પણ ફફડાટ ફેલાયો છે.