રાજકારણ:ભરૂચ - નર્મદા જિલ્લા માટે એક મોટુ દુઃખ જેનું નામ મનસુખ, છોટુ વસાવા

સ્થાનિક સ્વરાજની ચૂંટણી આવતાં જ ભરૂચ નર્મદા જિલ્લામાં BTP અને ભાજપ વચ્ચે આક્ષેપબાજીઓ શરૂ થઈ છે. ભાજપના સાંસદ મનસુખ વસવા અને BTP ના છોટુવસાવા સામસામે આક્ષેપબાજી કરી રહ્યા છે. ભરૂચ જિલ્લામાં BTPએ AIMIM સાથે ગઠબંધન કરતા રાજકીય ભૂકંપ આવ્યો છે. ભાજપના સાંસદ મનસુખ વસાવાએ ઓવૈસી અને છોટુ વસાવાને ગાંડા છે તેમ કહી BTP પર પ્રહાર કર્યા હતા. ત્યારે BTPના છોટુ વસાવાએ તો મનસુખ વસાવા પર સ્લોગન બનાવી પ્રહાર કર્યા હતા. છોટુ વસાવાએ કહ્યું કે, મનસુખભાઈ જ એક દુઃખ છે.મનસુખ એ સુખ નથી. નર્મદા અને ભરૂચનું જે દુઃખ છે તેનું નામ જ મનસુખ છે.

છોટુ વસાવાએ ભાજપ પર પ્રહાર કરતા જણવ્યું હતું કે, ભાજપે ભરતીમેળો ચાલુ કર્યો છે. બેરોજગારોની ભરતી નથી થતી પણ રાજકીય બેરોજગારોની ભરતી ચાલુ કરી છે. જે રીતે રાજ થવું જોઈએ તે રીતે થતું નથી. આજે કિશાનોના આંદોલનને 80 દિવસ થવા આવ્યા પણ ઉકેલ સરકાર લાવતી નથી.છોટુ વસાવાએ વડાપ્રધાન નરેન્દ્ર મોદી પર પણ પ્રહાર કર્યા હતા અને કહ્યું કે, નરેન્દ્ર મોદી કોર્પોરેટ સેક્ટરના ગુલામ છે. એટલે ખેડૂતોના પ્રશ્નોનો નિકાલ થતો નથી. આંદોલનનો નિકાલ નહિં આવે તો રાજકારણમાં વિસ્ફોટ થશે. જે રીતે ભારતમાં કોંગ્રેસની હાલત થઇ છે એજ હાલત ભાજપની પણ થવાની છે.