રામ મંદિર નિર્માણની તૈયારી:રાજકોટમાં VHPના રાષ્ટ્રીય પ્રવક્તાએ કહ્યું- દેશના 5 લાખથી વધુ ગામડાઓમાં જઈ 65 કરોડ લોકો પાસેથી રામ મંદિર નિર્માણ માટે દાન એકત્ર કરાશે

અયોધ્યામાં રામ મંદિર નિર્માણ માટે વિશ્વ હિન્દુ પરિષદની રાજકોટમાં પ્રેસ કોન્ફરન્સ યોજાઈ હતી. જેમાં ક્ષેત્ર મંત્રી અશોક રાવલ અને રાષ્ટ્રીય પ્રવક્તા દેવજી રાવત ઉપસ્થિત રહ્યાં હતા. દેવજી રાવતે જણાવ્યું હતું કે, અયોધ્યામાં રામ મંદિર નિર્માણમાં દેશના 5 લાખથી વધુ ગામડામાં જઈ 65 કરોડ લોકો પાસેથી દાન એકત્ર કરવામાં આવશે. આ માટે વિશ્વ હિન્દુ પરિષદ દ્વારા શ્રી રામ જન્મભૂમિ મંદિર નિર્માણ નિધિસંગ્રહ સમિતિની રચના કરવામાં આવી છે.

આ કાર્યમાં તમામ ધાર્મિક સંસ્થાઓ જોડાશે
દેવજી રાવતે વધુમાં જણાવ્યું હતું કે, રામ મંદિર નિર્માણ માટે લોકોમાં ઉત્સાહ બમણો જોવા મળી રહ્યો છે. દેશના 5 લાખ કરતા વધુ ગામડાઓના 65 કરોડ લોકો પાસેથી દાન એકત્ર કરવામાં આવશે. આગામી 15 જાન્યુઆરી મકરસંક્રાંતિ પર્વ થી 27 ફેબ્રુઆરી માઘપૂર્ણિમા સુધી અભિયાન ચાલાવવામાં આવશે. જેમાં તમામ ધાર્મિક સંસ્થાઓ, મઢ, મંદિરો, RSS તથા વિચાર ક્ષેત્રની તમામ સંસ્થાઓ જોડાશે. વિશ્વ હિન્દુ પરિષદના સૌરાષ્ટ્ર પ્રાંતના 18 જિલ્લાના 6 હજાર ગામડાઓમાં 40 લાખ કાર્યકરો નિધિ સંગ્રહ કરવા જોડાશે.

નાનામાં નાનો મજૂર પણ પોતાનું યોગદાન આપી શકે છે
દેવજી રાવતે વધુમાં જણાવ્યું હતું કે, 5 લાખ ગામડાની અંદર નાનામાં નાનો મજૂર અને ખેતી સાથે સંકળાયેલા લોકો પણ રામ મંદિર નિર્માણમાં પોતાનું યોગદાન આપી શકે છે. લોકો વિના સંકોચે દાન આપે તેવી અપીલ છે. રામ મંદિર નિર્માણમાં દેશના ગામડાઓના લોકોનું પણ યોગગદાન મહત્વપૂર્ણ રહેશે.