તમારા શહેરના લેટેસ્ટ સમાચાર અને ફ્રી ઈ-પેપર મેળવો

ડાઉનલોડ કરો

કમોસમી વરસાદ:ગોંડલ, શાપર-વેરાવળ અને કાલાવડ પંથકમાં ભારે પવન સાથે ધોધમાર વરસાદ, રસ્તા પર પાણી ફરી વળતા વાતાવરણમાં ઠંડક પ્રસરી

રાજકોટ2 મહિનો પહેલા
કાલાવડના કાલમેઘડા ગામે ભારે પવન સાથે ધોધમાર વરસાદ વરસ્યો.
  • ગોંડલના આંબરડી, કોલીથડ, હડમતાળા, બેટાવડ સહિતના ગામોમાં ધોધમાર વરસાદ
  • રાજકોટ અને જસદણમાં વરસાદી માહોલ, આકાશ કાળા ડિબાંગ વાદળોથી ઘેરાયું

તાઉ-તે વાવાઝોડામાં રાજ્યભરમાં ક્યાંક ધીમી ધારે તો ક્યાંક ધોધમાર વરસાદ વરસ્યો હતો. પરંતુ વાવાઝોડા બાદ ફરી સૌરાષ્ટ્રના વાતાવરણમાં પલ્ટો જાવા મળી રહ્યો છે. આજે આખો દિવસ વાદળાછાયું વાતાવરણ જોવા મળ્યું હતું. અસહ્ય બફારા વચ્ચે ગોંડલ, શાપર-વેરાવળ અને કાલાવડ પંથકમાં આજે બપોર બાદ ભારે પવન સાથે ધોધમાર વરસાદ વરસ્યો હતો. વરસાદથી રસ્તાઓ પર પાણી ફરી વળતા વાતાવરણમાં ઠંડક પ્રસરી ગઈ છે. રાજકોટમાં વરસાદી માહોલ જામ્યો છે અને આકાશ કાળા ડિબાંગ વાદળોથી ઘેરાયું છે. લોધિકાના ઢોલેરા ગામે પણ ભારે પવન સાથે વરસાદ વરસ્યો હતો.

વરસાદ પહેલા ધૂળની ડમરી ઉડી
ગોંડલ પંથકમાં વરસાદી માહોલ જોવા મળી રહ્યો છે. ગોંડલના આંબરડી, કોલીથડ, હડમતાળા, બેટાવડ સહિતના ગામોના વાતાવરણમાં પલ્ટો આવ્યો હતો અને આકાશ કાળા ડિબાંગ વાદળોથી ઘેરાયું હતું. અચાનક જ ભારે પવન ફૂંકાવાનું શરૂ થતા ધૂળની ડમરી ઉડી હતી. બાદમાં ગાજવીજ સાથે ધોધમાર વરસાદ વરસતા રસ્તા પર પાણી ફરી વળ્યાં હતા. તેમજ કાલાવડ તાલુકાના કાલમેઘડા ગામે મિની વાવાઝોડા સાથે વરસાદ વરસ્યો હતો.

ગોંડલ પંથકમાં ધોધમાર વરસાદ.
ગોંડલ પંથકમાં ધોધમાર વરસાદ.

જસદણ પંથકમાં પણ વરસાદી માહોલ
જસદણ પંથકમાં પણ વરસાદી માહોલ જામ્યો છે. આકાશ કાળા ડિબાંગ વાદળોથી ઘેરાયું છે. આખો દિવસ બફારામાં લોકો પરેશાન થયા બાદ સાંજે વાતાવરણમાં પલ્ટો આવતા અને ફૂંકાતા લોકોએ ગરમીમાંથી રાહત મેળવી છે.

ગ્રામ્ય પંથકમાં રસ્તા પર પાણી ફરી વળ્યા.
ગ્રામ્ય પંથકમાં રસ્તા પર પાણી ફરી વળ્યા.

કમોસમી વરસાદથી ઉનાળુ પાકને નુકસાન
હાલ ઉનાળુ પાક તલ, બાજરી, મગ, અડદ અને મગફળી તૈયાર થવાના આરે છે. ત્યારે કમોસમી વરસાદથી આ પાકને નુકસાન પહોંચ્યું છે. ઉનાળુ પાકમાં નુકસાનની ભીતિ ખેડૂતોમાં સેવાય રહી છે.

(દેવાંગ ભોજાણી, ગોંડલ/કરસન બામટા, આટકોટ)