બુટલેગર મર્ડર કેસ:વિશાલે બે મિત્રને ફોન કરી કહ્યું, ‘લોહી સાફ કરી લાશનો નિકાલ કરવો છે તમે આવો’, ના પાડતાં ખૂનમાં ફિટ કરી દેવાની ધમકી આપી બંનેને તૈયાર કર્યા હતા

રાજકોટ5 મહિનો પહેલા
  • કૉપી લિંક
વિશાલ, વિવેક, અમિત - Divya Bhaskar
વિશાલ, વિવેક, અમિત
  • દારૂની પાર્ટીમાં ગાળાગાળી થયા બાદ બૂટલેગર મિત્રના કારખાને ગયો અને ફરીથી વાણીવિલાસ કરતા વિશાલે હથોડી અને લોખંડના રોડ ફટકારી પતાવી દીધો’તો
  • ગોકુલધામ કવાર્ટરમાં રહેતા બૂટલેગરની ક્રૂરતાથી હત્યા કરી લાશનો નિકાલ કરવાના ચકચારી પ્રકરણમાં સૂત્રધાર સહિત ત્રણ આરોપી ઝડપાયા

ગોંડલ રોડ પર રિદ્ધિસિદ્ધિના નાળા પાસેથી શુક્રવારે રાત્રે બોક્સમાં ફિટ કરેલી બૂટલેગરની લાશ મળવાના પ્રકરણમાં પોલીસે ગણતરીની કલાકમાં જ હત્યાનો ભેદ ઉકેલી નાખ્યો હતો. બૂટલેગર સંજયને તેના જ મિત્ર વિશાલે દારૂની પાર્ટીમાં થયેલી બોલાચાલી બાદ હથોડી અને લોખંડના રોડ ઝીંકીને પતાવી દીધો હતો. હત્યા કર્યા બાદ લોહીના ડાઘ સાફ કરવા અને લાશનો નિકાલ કરવા માટે વિશાલે તેના બે મિત્રોને હત્યામાં ફિટ કરાવી દેવાની ધમકી આપી પોતાની મદદ માટે તૈયાર કર્યા હતા.

ગોકુલધામ ક્વાર્ટર્સમાં રહેતા બૂટેલગર સંજય રાજેશભાઇ સોલંકી (ઉ.વ.37)ની હત્યા કરી બોક્સમાં ફિટ કરી દેવાયેલી લાશ શુક્રવારે રાત્રે 9 વાગ્યે મળી આવી હતી. હત્યાનો ભેદ ઉકેલવા પોલીસની અલગ અલગ ટીમ મેદાને ઉતરી હતી. પોલીસે 40 લોકોને રાઉન્ડઅપ કરી પૂછપરછ કરતાં ક્રાઇમ બ્રાંચના પીએસઆઇ જેબલિયાને માહિતી મળી હતી કે સંજયને બે દિવસથી તેના મિત્ર વિશાલ વિરેન્દ્ર બોરીસાગર સાથે માથાકૂટ ચાલતી હતી. પોલીસ વિશાલ સુધી પહોંચી ગઇ હતી અને આગવીઢબે પૂછપરછ કરતાં વિશાલે હત્યાની કબૂલાત આપી હતી.

વિશાલ બોરીસાગરે પોલીસ સમક્ષ કબૂલાત આપી હતી કે, સંજય સોલંકી તેનો મિત્ર હતો અને તા.25ના બંને મિત્રો દારૂની પાર્ટી કરવા બેઠા હતા ત્યારે સંજયે દારૂના નશામાં ગાળો ભાંડી હતી, ત્યારબાદ તા.27ના બપોરે ફરીથી પાનની દુકાન પાસે સંજયે ગાળો દેતા પોતે પણ ઉશ્કેરાયો હતો અને તેની સાથે બોલાચાલી કરી 150 ફૂટ રિંગ રોડ પર ફોર્ચ્યુન હોટેલ સામે આવેલા પોતાના કારખાને જતો રહ્યો હતો. કારખાને પોતે બેઠો હતો ત્યારે સાંજે પાંચ વાગ્યે સંજય કારખાને ધસી આવ્યો હતો અને ફરીથી ગાળો ભાંડવા લાગ્યો હતો.

બે દિવસથી સંજય ગાળો આપી રહ્યો હોય પોતે ઉશ્કેરાઇ ગયો હતો અને કારખાનામાં પડેલી લોખંડની હથોડી ઉઠાવી તેને આડેધડ ઘા ઝીંકી દીધા હતા અને બાદમાં લોખંડના રોડ પણ ફટકાર્યા હતા. સંજયની હત્યા કર્યા બાદ વિશાલ પોતાના ઘરે જતો રહ્યો હતો અને કારખાનામાં પડેલા લોહીના ખાબોચિયાં દૂર કરવા અને લાશનો નિકાલ કરવા માટે મિત્ર વિવેકને ફોન કર્યો હતો પરંતુ વિવેકે આવવાની ના કહેતા તેને ખૂન કેસમાં ફિટ કરાવી દેવાની ધમકી આપતા તે આવ્યો હતો અને બંનેએ લોહીના ખાબોચિયાં સાફ કરી નાખ્યા હતા અને વિવેકની મદદથી લાશ કોથળામાં ભરી દીધી હતી અને બંને કારખાનેથી નીકળી ગયા હતા.

આખીરાત લાશ કોથળામાં ભરેલી હાલતમાં કારખાનામાં પડી રહી હતી. લાશનો નિકાલ કરવા માટે તા.28ના સવારે અમિત કોઠિયાને ફોન કર્યો હતો અને લાશને પેક કરી શકાય તેવું બોક્સ લઇને આવવાનું કહ્યું હતું, અમિતે ના કહેતા તેને પણ બૂટલેગરની હત્યામાં સંડોવવાની ધમકી આપી તૈયાર કર્યો હતો. અમિત કારખાને આવતા લાશ બોક્સમાં ફિટ કરી દીધી હતી અને લાશ ભરેલું બોક્સ અમિતે સ્કૂટરમાં બાંધી દીધું હતું. ત્યારબાદ વિશાલ બોક્સ સાથેનું સ્કૂટર લઇને નિકાલ કરવા નીકળ્યો હતો અને રિદ્ધિસિદ્ધિ નાળા પાસે પહોંચ્યો હતો ત્યારે સ્કૂટર પરથી બોક્સ પડી જતાં તે બોક્સ મૂકીને નાસી ગયો હતો. પોલીસે ત્રણેય આરોપીની ધરપકડ કરી હતી.

ઘાતકી હત્યાનો ઘટનાક્રમ

  • બૂટલેગર સંજય અને કારખાનેદાર વિશાલ મિત્રો હતા અને અવાર-નવાર મહેફિલ કરતા હતા.
  • તા.25ના બંને દારૂના નશામાં બફાટ કરવા લાગતાં સંજયે મિત્ર વિશાલને ગાળો ભાંડી હતી
  • તા.27ના બપોરે 12 વાગ્યે પાનની દુકાને ફરીથી એ મુદ્દે માથાકૂટ થઇ અને વિશાલ પોતાના કારખાને જતો રહ્યો
  • તા.27 સાંજે 5 વાગ્યે સંજય કારખાને પહોંચ્યો હતો અને ફરીથી ગાળો ભાંડવા લાગ્યો
  • ઉશ્કેરાયેલા વિશાલે મિત્ર સંજયને હથોડી અને લોખંડના રોડ ફટકારી પતાવી દીધો
  • તા.27ની રાત્રે 9 વાગ્યે મિત્ર વિવેકને બોલાવી લોહીના ખાબોચિયાં સાફ કરી લાશને કોથળામાં પેક કરી દીધી
  • તા.28ના સવારે 10 વાગ્યે મિત્ર અમિતને લાશનો નિકાલ કરવા વિશાલે બોલાવ્યો પરંતુ તે ન ગયો
  • સાંજે 4 વાગ્યે ધમકી દેતા અમિત કારખાને ગયો અને લાશને બોક્સમાં પેક કરી
  • રાત્રે 9 વાગ્યે વિશાલ સ્કૂટર પર લાશ ભરેલું બોક્સ લઇને નીકળ્યો અને બોક્સ નાળા પાસે પડી ગયું
  • રાત્રે 2 વાગ્યે વિશાલની સંડોવણી સ્પષ્ટ થતાં પોલીસે તેને ઉઠાવ્યો અને બાકીના બે આરોપી પણ હાથ આવી ગયા
અન્ય સમાચારો પણ છે...