ત્રાહિમામ્:ડાબી બાજુ વળવાનું હોય ત્યાં રિક્ષાના ખડકલા હોય છે, સાઈકલ ટ્રેક પરથી વાહનચાલકો પસાર થાય છે, વોર્ડન અને પોલીસ ગાયબ હોય છે

શહેરની ટ્રાફિક સમસ્યા ઉકેલવામાં નિષ્ફળ ગયેલી પોલીસના વાંકે શહેરીજનો દંડનો ભોગ બની રહ્યા છે. સ્માર્ટ સિગ્નલે પોલીસ દ્વારા ચલાવાતી સ્માર્ટ લૂંટથી શહેરીજનો ત્રાહિમામ્ પોકારી ઉઠ્યા છે. અધિકારીઓ દ્વારા અપાયેલા ટાર્ગેટ પૂરા કરવા ટ્રાફિક પોલીસ યેનકેન પ્રકારે વાહન ચાલકોને દંડી રહી છે. ડાબીબાજુ વળવા ઇચ્છુક વાહનચાલક ટ્રાફિકજામને કારણે આગળ વધી શકતો નથી અને તે કારણે ટ્રાફિક સમસ્યા વધુ વિકટ બની છે. પોલીસની નિષ્ફળતા દર્શાવતી તસવીરો કેમેરામાં કેદ થઇ હતી.

રૈયા ટેલિફોન એક્સચેન્જથી કોટેચા ચોક તરફ જવા ઇચ્છુક વાહનચાલક ઇન્દિરા સર્કલ પાસે પહોંચતા હતા ત્યારે તેમને ડાબીબાજુ વળવું હતું, પરંતુ પૂરો રસ્તો વાહનોથી પેક થઇ ગયો હતો અને ડાબીબાજુ વળી શકાય તેમ ન હોવાથી વાહનચાલકો સાઇકલ ટ્રેક પર વાહન ચડાવીને ડાબીબાજુ વળતાં જોવા મળ્યા હતા.

કેકેવી ચોકમાં ચારેય બાજુ વાહનોના થપ્પા લાગે છે, રેડ લાઇટ થતાં જ વાહનચાલકોને અટકી જવાનું હોય છે, પરંતુ ત્યાં ફરજ પર રહેલા સ્ટાફની આળસવૃત્તિને કારણે વાહનચાલકો દંડાઇ રહ્યા છે. ગ્રીન સિગ્નલ થતાં વાહનો આગળ ધપે છે સ્ટોપલાઇન નજીક પહોંચેલા વાહનચાલક જો સ્ટોપલાઇન ક્રોસ કરી જાય તો મેમો આવે છે.

ઇન્દિરા સર્કલે ટ્રાફિક પોલીસની ડાંડાઇના દર્શન રોજિંદા જોવા મળે છે. યુનિવર્સિટી રોડ પરથી આવતો વાહનચાલક રૈયા ટેલિફોન એક્સચેન્જ તરફ જવા ઇચ્છતો હોય અને તે ઇન્દિરા સર્કલ સિગ્નલ પાસે પહોંચે છે ત્યારે તેને ડાબીબાજુ વળવું હોય છે પરંતુ ડાબીબાજુ આડેધડ રીતે રિક્ષા સહિતના વાહનો ખડકાઇ જાય છે.

કેકેવી ચોકમાં બપોરે ટ્રાફિક પોલીસ અને ટ્રાફિક બ્રિગેડે તમામ સાઇડ ખોલી નાખી હતી અને સિગ્નલ ચાલુ રાખ્યા હતા, વાહનચાલકો રેડ સિગ્નલ હોવા છતાં આગળ જતા હતા અને સીસીટીવી કન્ટ્રોલરૂમમાં તેના ઇ-મેમો જનરેટ થતા હતા, ચારેય બાજુ ખૂલી રાખવાને કારણે વાહનચાલકો સામસામે પણ આવી ગયા હતા.