મમતાનો દરિયો છલકાયો:બાળકના જન્મ બાદ 16 દિવસે સ્પર્શ કર્યો, ખુશી એટલી થઈ કે આંખોમાંથી છલકાઈ

જંગલેશ્વરના ફિનાઝબેન કુરેશીને કોરોના પોઝિટિવ આવ્યો ત્યારે ગર્ભવતી હતા અને બીજા જ દિવસે સિઝેરિયન કરાયું હતું. તેમણે પુત્રને જન્મ આપ્યો હતો પણ કોરોનાને કારણે બંનેને અલગ રખાયા હતા. બાળકનો રિપોર્ટ નેગેટિવ આવતા તબીબે માતાની સાથે ન રાખવાનો નિર્ણય લીધો હતો તેથી માતા-પુત્ર કદી એકબીજાને જોઈ શક્યા ન હતા. આખરે ફિનાઝબેનને કોવિડ હોસ્પિટલમાંથી ડિસ્ચાર્જ કરીને ગાયનેક વિભાગમાં લવાયા ત્યારે બાળકને સોંપાયું હતું. ફિનાઝબેનના પતિ શાહિદભાઈએ જણાવ્યું હતું કે ‘હું અને નર્સ દીકરાને લઈને તેની પાસે ગયા હતા ત્યારે તે બોલી શકી ન હતી પણ ખુશી એટલી હતી કે આંખોથી છલકી રહી હતી. ’