આજે પાટીલ રાજકોટમાં:રૂપાણી અને વાળાને અચાનક બહાર જવાનું થયું; સત્તા પરિવર્તન બાદ ભાજપમાં શરૂ થયેલી તનાતનીમાં કોણ ફાવશે, કોણ હારશેની ચર્ચા

રાજકોટ10 મહિનો પહેલા
  • કૉપી લિંક
સીઆર પાટીલ - ફાઈલ તસવીર. - Divya Bhaskar
સીઆર પાટીલ - ફાઈલ તસવીર.
  • રાજકોટ ભાજપમાં હવે ત્રીજા જૂથે અસ્તિત્વની લડાઈમાં વધુ પાવર બતાવવાનું શરૂ કર્યું

પ્રદેશ ભાજપ-પ્રમુખ સીઆર પાટીલ શનિવારે રાજકોટ આવી રહ્યા છે અને તેમની ઉપસ્થિતિમાં અનેક કાર્યક્રમો યોજાવાના છે. રાજ્યમાં સત્તા પરિવર્તન બાદ પાટીલ પ્રથમ વખત રાજકોટ આવી રહ્યા છે, એવા સમયે જ પૂર્વ મુખ્યમંત્રી વિજયભાઇ રૂપાણી અને રાજ્યના પૂર્વ નાણામંત્રી તથા કર્ણાટકના માજી રાજ્યપાલ વજુભાઇ વાળા પણ બહારગામ હોઈ, કાર્યકરોમાં આ બાબત ચર્ચાનો વિષય બન્યો છે.

રાજકોટમાં પ્રદેશ ભાજપ-પ્રમુખ સીઆર પાટીલનો 20મીનો કાર્યક્રમ અગાઉથી જાહેર થઇ ગયો હતો અને પાટીલની હાજરીમાં 20મીએ કાર્યકર્તા સ્નેહમિલન યોજાવાનું હતું, પરંતુ 15મીએ શહેર ભાજપે સ્નેહમિલન યોજી નાખ્યું હતું અને એમાં જે રીતે સિનિયર નેતાઓ વચ્ચે બોલાચાલી થઇ એના બીજા જ દિવસે પાટીલની હાજરીમાં યોજાનારું સ્નેહમિલન રદ કરવાની જાહેરાત થઇ હતી.

આ તમામ તનાતની વચ્ચે શનિવારે સવારે 9.30 વાગ્યે સીઆર પાટીલ એરપોર્ટ પર આવી પહોંચશે, ત્યાં શહેર ભાજપ દ્વારા તેમનું સ્વાગત કરવામાં આવશે, 10 વાગ્યે સર્કિટ હાઉસ ખાતે પત્રકાર પરિષદ યોજી પ્રદેશ પ્રમુખ ત્રણ-ચાર ખાનગી કાર્યક્રમમાં હાજરી આપશે. બપોરે 12.30 વાગ્યે ઇમ્પીરિયલ હોટલ ખાતે ઉદ્યોગપતિઓ સાથે મિલન યોજાશે, 3 વાગ્યે શહેર ભાજપના આગેવાનો સાથે હેમુ ગઢવી હોલ ખાતે મિલન થશે અને એ જ સ્થળે 4 વાગ્યે બ્રહ્મ સમાજના કાર્યક્રમમાં હાજર રહેશે.

સત્તાપરિવર્તન બાદ સીઆર પાટીલ પ્રથમ વખત રાજકોટ આવી રહ્યા છે, ત્યારે પૂર્વ મુખ્યમંત્રી વિજયભાઇ રૂપાણી અને પૂર્વ નાણામંત્રી વજુભાઇ વાળા રાજકોટમાં હાજર રહેશે નહીં. બંને નેતાઓ બહારગામ હોવાનું કહેવામાં આવ્યું હતું. બ્રહ્મ સમાજ દ્વારા વિશેષ કાર્યક્રમનું આયોજન કરવામાં આવ્યું છે ત્યારે બ્રહ્મ સમાજના જ આગેવાન નીતિન ભારદ્વાજ પણ બહારગામ હોવાનું સ્થાનિક નેતાઓ દ્વારા કહેવામાં આવી રહ્યું છે.

કેટલાક આગેવાનો સાથે બંધબારણે બેઠક થવાની સંભાવના
પ્રદેશ પ્રમુખ પાટીલની હાજરીમાં શહેરના હોદ્દેદારો અને સંગઠનની વિવિધ પાંખના નેતાઓની બેઠકનું આયોજન કરવામાં આવ્યું છે. આ કાર્યક્રમમાં મીડિયાને પ્રવેશ નિષેધ કરવામાં આવ્યો છે. શહેર ભાજપમાં કેટલાક દિવસોથી શરૂ થયેલા જૂથવાદ મુદ્દે પ્રદેશ પ્રમુખ કેટલાક નેતાઓ માટે સાંકેતિક વાતો કરશે તેમજ કેટલાક નેતાઓ સાથે બંધબારણે પણ બેઠક કરશે, એવું ભાજપનાં સૂત્રોએ કહ્યું હતું.

અન્ય સમાચારો પણ છે...