પ્રેમીને પામવા પ્રયત્ન:UPમાં રહેતા પ્રેમીને પરણવા યુવતી સાઇકલ લઈ નીકળી ગઈ, અભયમની ટીમે 3.30 કલાકે મનાવી, પિતા પર છેડતીના પ્રયત્નનો આક્ષેપ

રાજકોટમાં રહેતી સોહાના અને યુપીમાં રહેતા શુભમ વચ્ચે પ્રેમસંબંધ હતો. શુભમ સાથે લગ્ન કરવા માટે સોહાના કારખાને જવાનું બ્હાનું આપીને પોતાના ઘરેથી સાઇકલ લઈને નીકળી ગઇ હતી. 181ની ટીમને જ્યારે આ વાતની ખબર પડી ત્યારે તેને બચાવવા માટે સ્થળ પર પહોંચ્યા ત્યારે યુવતીએ પોતાના સાવકા પિતા તેને હેરાન કરતા હોવાનું બહાનું આપ્યું હતું. યુવતીને મનાવતા 181ની ટીમને 3.30 કલાકનો સમય નીકળી ગયો હતો. 181ના કાઉન્સેલર શીતલબેનના જણાવ્યાનુસાર શનિવારે તેમને એક વ્યક્તિનો ફોન આવ્યો હતો કે, આજી ડેમ નજીક આવેલ શીતળા માતાના મંદિરે એક યુવતી બપોરના 3.00 વાગ્યે એકલી બેઠી છે.

અભયમની ટીમે પિતાની લેખિતમાં ખાતરી લીધી
181ની ટીમ સ્થળ પર પહોંચીને યુવતી સાથે વાતચીત કરી. વાતચીત દરમિયાન યુવતીએ જણાવ્યું હતું કે, તે યુપીમાં રહેતા એક યુવકને પ્રેમ કરે છે, પરંતુ તેના માતાપિતા તેના લગ્ન બીજે કરાવી દેશે. તેની માતાએ બીજા લગ્ન કર્યા છે. તેથી તેના પિતાએ તેની છેડતી કરવાનો પ્રયત્ન કર્યો હતો. આથી તે કંટાળીને તેના ઘરેથી મંદિરે આવી ગઇ છે.યુવતીના માતાપિતાએ 181ની ટીમને એવું કહ્યું હતું કે, જો તેમને જણાવ્યું હોત તો તેને ગમતા છોકરા સાથે લગ્ન કરાવી દેત. જ્યારે 181ની ટીમે યુવતીના પિતા પાસેથી હેરાન નહિ કરવાની લેખિતમાં ખાતરી પણ માગી હતી. જ્યારે યુવતીને આ રીતે ઘરેથી બહાર નહીં જવા માટે જણાવ્યું હતું.