કાર્યવાહી:‘તમારા પટ્ટા-ટોપી ઉતરાવી દઇશ’ કહી ચાલકે જમાદાર સાથે હાથાપાઇ કરી

રાજકોટ16 દિવસ પહેલા
  • કૉપી લિંક
  • મોરબી રોડ ચેક પોસ્ટ પર પૂરઝડપે કાર ચલાવી ભાગેલા ચાલકે જમાવ્યો રોફ

પોલીસ સાથે સમયાંતરે લોકો વાણીવિલાસ કરી ઘર્ષણ કરતા હોય છે. ત્યારે હાલ ચાલી રહેલા ચૂંટણીના માહોલ વચ્ચે મોરબીના વેપારીએ પોલીસ જમાદાર સામે રોફ છાંડી સીન જમાવતા લોકઅપમાં બેસવાનો વખત આવ્યો છે. કુવાડવા રોડ પોલીસ મથકમાં ફરજ બજાવતા કોન્સ. આર.એ.ગઢવીએ નોંધાવેલી ફરિયાદમાં, તેઓ અન્ય કર્મચારીઓ સામે મોરબી હાઇવે પર કાગદડી ચેક પોસ્ટ પર નોકરીએ હતા. આ સમયે અહીંથી એક કાર પૂરઝડપે કાવો મારી ચેક પોસ્ટ પરથી ભાગી હતી. જેથી મોરબી રોડ પર પેટ્રોલિંગ કરી રહેલી અન્ય પોલીસને જાણ કરતા તેમને કારને અટકાવી રોકી હતી.

બાદમાં પોતે પણ પાછળ પાછળ ત્યાં પહોંચ્યા હતા. અને તમને ઊભા રહેવાનો ઇશારો કરવા છતાં કેમ કાર ઊભી ન રાખી, તમારું નામ શું છે તેમ પૂછતા તે ચાલક તાડૂકી વાણીવિલાસ કરવા લાગ્યો હતો અને પોલીસ મારું કાંઇ પણ કરી શકશે નહિ, મારી કાર ઊભી રાખું કે ન રાખું, તમારા બાપનો રોડ નથી તેમ કહી ઝઘડો કર્યો હતો. ત્યારે સાથે રહેલા હેડ કોન્સ. વિક્રમભાઇ સાથે ચાલકે ઝઘડો કરી હાથાપાઇ કરી પાટા મારી વિખોડિયા ભરી લીધા હતા. અને તમારા બધાના પટ્ટા-ટોપી ઉતરાવી દઇશ, તમે મને ઓળખતા નથી હું કોણ છું, તમને બધાને જોઇ લઇશની ધમકી આપી હતી.

ચાલકના ઉદ્ધતાઇભર્યા વર્તન બાદ તેને પોલીસ મથક લઇ જવાયો હતો. ત્યાં પણ તેને તેનું નામ કહેવાને બદલે ખિસ્સામાંથી આધારકાર્ડ કાઢી વાંચી લ્યો આમા નામ છે તેમ કહ્યું હતું. જેમાં નજર કરતા તે શખ્સ મોરબી, રવાપર રોડ, શારદા સોસાયટીમાં રહેતો અને વેપાર કરતો નિરવ દિનેશ બકરાણિયા હોવાનું જાણવા મળ્યું હતું. બાદમાં તેની સામે હાથાપાઇ કરી ધમકી આપી ફરજમાં રુકાવટ કર્યાનો ગુનો નોંધી કાયદાનું ભાન કરાવ્યું છે.

અન્ય સમાચારો પણ છે...