ચૂંટણીના ચમકારા ઓફ ધ રેકર્ડ:જે બૂથમાં સૌથી વધુ લીડ તેમને 15 હજારનું ઇનામ, વોર્ડના ઉપપ્રમુખે હરીફની શેરી સભા બંધ કરાવી

રાજકોટ મહાનગરપાલિકાની ચૂંટણીમાં ભાજપ અને કોંગ્રેસ પક્ષ કાર્યકર્તાઓને દોડતા રાખવા અને વિજેતા થવા માટે ઇન્સેન્ટિવ સ્કીમ મૂકી રહ્યા છે. ચૂંટણીમાં નાસ્તો, ભોજન સહિતનો ખર્ચ તો ઉમેદવારો કરતા જ હોય છે, પરંતુ હવે કાર્યકર્તાઓ માટે ઇન્સેન્ટિવ સ્કીમ પણ મૂકવામાં આવી છે. વોર્ડમાં જે બૂથ પર સૌથી વધુ લીડ મળશે તે બૂથના કાર્યકર્તાઓને 15000, બીજા નંબરની લીડ મેળવાનાર બૂથને 11000 અને ત્રીજા નંબર પરના બૂથને 5 હજાર રૂપિયાનું ઇનામની જાહેરાત કરવામાં આવી છે.

વોર્ડના ઉપપ્રમુખે હરીફની શેરી સભા બંધ કરાવી​​
રાજકોટ મહાનગરપાલિકાની ચૂંટણીમાં તમામ વોર્ડમાં ઉમેદવારો પ્રચાર માટે જુદી જુદી સોસાયટીઓમાં શેરી સભા, પદયાત્રા સહિતના કાર્યક્રમો થકી મતદાતા સુધી પહોંચવા પ્રયાસ કરી રહ્યા છે. ત્યારે એક વોર્ડમાં હરીફ એક રાજકીય પક્ષની શેરી સભા ચાલી રહી હતી ત્યારે તે શેરીમાં જ રહેતા વોર્ડના ઉપપ્રમુખ આવી પહોંચ્યા હતા. આ સભામાં ઉપપ્રમુખના પરિવારજનો પણ હાજર હતા. ત્યારે ઉપપ્રમુખે સભા બંધ કરાવી હતી અને અમારી સોસાયટીમાં બીજી વખત આવ્યા તો મજા નહીં આવે તેવી ધમકી પણ આપી હતી. જેના પગલે થોડો સમય ગરમા ગરમીના દૃશ્યો જોવા મળ્યા હતા. બાદમાં મામલો શાંત પડ્યો અને સભા વહેલી પૂર્ણ કરી લેવામાં આવી હતી.