ક્રાઇમ:સ્ટોનકિલરનો આપઘાતનો પ્રયાસ, તેના ત્રાસથી 1 કેદીએ દીવાલમાં માથું પછાડ્યું

રાજકોટ શહેરમાં ત્રણ-ત્રણ વ્યક્તિની પથ્થરના ઘા ઝીંકી હત્યા કરનાર સ્ટોનકિલર હિતેષ રામાવતે સોમવારે રાત્રે જેલમાં દવાના વધુ પડતાં ટીકડાં ખાઇ લીધા હતા, જ્યારે અન્ય એક કેદીએ દીવાલ સાથે માથું અફડાવી પોતાને ઇજા કરી હતી, બંનેને હોસ્પિટલમાં ખસેડવામાં આવ્યા હતા. સ્ટોનકિલર સતત ઝઘડા કરતો હોવાથી પોતે કૃત્ય આચર્યાનું કેદીએ રટણ રટ્યું હતું. તેની સાથે જ જેલમાં રહેલા ભચાઉના હરિશ્ચંદ્રસિંહ બળવંતસિંહ વાઘેલાએ પણ જેલની દીવાલ સાથે પોતાનું માથું અથડાવી ઇજા પહોંચાડી હતી.

જેલ સ્ટાફે બંનેને રાત્રે જ હોસ્પિટલમાં ખસેડ્યા હતા. પોલીસ સૂત્રોએ જણાવ્યું હતું કે, સ્ટોનકિલર બેભાન હોય તેની પૂછપરછ થઇ શકી નહોતી જ્યારે કેદી હરિશ્ચંદ્રસિંહ વાઘેલાએ નિવેદન આપવાનો ઇનકાર કરી દીધો હતો. સ્ટોનકિલર ભાનમાં આવ્યા બાદ તેની પૂછપરછ થયે સાચું કારણ બહાર આવશે તેવું તપાસનીશ અધિકારીએ જણાવ્યું હતું. જ્યારે સંજય નામના એક કેદીને પણ બીમારી સબબ રાત્રે હોસ્પિટલમાં ખસેડાયો હતો.