તમારા શહેરના લેટેસ્ટ સમાચાર અને ફ્રી ઈ-પેપર મેળવો

ડાઉનલોડ કરો

ક્રાઇમ:રાજકોટમાં સિક્યુરિટી ઇન્ચાર્જને હનીટ્રેપમાં ફસાવી મહિલાએ 2.50 લાખ માગ્યા, ATM પાસેથી લોકોએ બે શખ્સોને ઝડપી લઇ પોલીસ હવાલે કર્યા

રાજકોટ6 મહિનો પહેલા
પ્રતીકાત્મક તસ્વીર
  • પોલીસે તાકિદે તપાસ હાથ ધરી બે શખ્સોની ધરપકડ કરી, મહિલાની શોધખોળ ચાલુ
  • બંને મળતિયાને રૂ.10-10 હજાર મળવાના હતા

મિત્રતાના નામે અને એકાંત માણવા લઇ જવાનું કહી જાળમાં ફસાવતી મહિલા અને તેની ગેંગનો વધુ એક યુવક ભોગ બન્યો હતો. સિક્યુરિટી ઇન્ચાર્જને ફોન પર ફ્રેન્ડ બનવાનું કહી મહિલાએ એકાંત માણવા બોલાવ્યો હતો. મહિલાની સાથે જઇ રહેલા યુવકને અન્ય ત્રણ શખ્સોએ આંતરી અવાવરું સ્થળે લઇ જઇ રૂ.2.50 લાખની માગ કરી હતી. બે શખ્સને લોકોએ ઝડપી લઇ પોલીસ હવાલે કર્યા હતા જ્યારે મહિલા સહિત બેની શોધખોળ કરી હતી.

જામનગર રોડ પરની અવધ રેસિડેન્સિમાં રહેતા ગ્રૂપ થ્રી નામની સિક્યુરિટી એજન્સીના સંચાલક રમણજી ચંદ્રેશ્વરપ્રસાદ યાદવે (ઉ.વ.31) ગાંધીગ્રામ પોલીસ સ્ટેશનમાં નોંધાવેલી ફરિયાદમાં આરોપી તરીકે એક મહિલા સહિત ચાર શખ્સોના નામ આપ્યા હતા. રમણજી યાદવે ફરિયાદમાં જણાવ્યું હતું કે, ગત તા.10ની રાત્રીના 2.30 વાગ્યે પોતે સિક્યુરિટી ગાર્ડને ચેક કરવા માટે બાઇક પર જતો હતો ત્યારે તેના મોબાઇલ પર ફોન આવ્યો હતો અને ફોન કરનારે પોતાની ઓળખ મનીષા તરીકે આપી હતી અને ફ્રેન્ડશીપની ઓફર કરી હતી અને જામનગર રોડ પર માધાપર ચોકડી પાસે મળવા બોલાવ્યો હતો.

મહિલાએ અધવચ્ચે વાહન ઊભું રખાયું
રાત્રે 3.15 વાગ્યે રમણજી બાઇક લઇને ત્યાં પહોંચતા મનીષા નામની તે મહિલાએ તેની ફ્રેન્ડનું મકાન ખાલી છે ત્યાં જવાનું કહી યુવકના બાઇક પાછળ બેસી ગઇ હતી. મોરબી રોડ પર અતિથિ દેવો ભવ હોટેલ નજીક પહોંચતા મહિલાએ લઘુશંકા જવાનું કહી બાઇક ઊભું રખાવ્યું હતું અને તે થોડે દૂર લઘુશંકા કરવા ગઇ હતી અને થોડીવારમાં જ ત્રણ શખ્સ ધસી આવ્યા હતા, તું મારી બહેનને લઇને ક્યાં જાશ તેમ કહી રમણજીને ગાળો ભાંડી તેની પાસેથી બાઇક અને બે ફોન લૂંટી લીધા હતા, મહિલાને લઇને અશ્વિન નાસી ગયો હતો જ્યારે અનીલ હમીર સારેસા અને દિલીપ ઉર્ફે દિલો લાખા ગોહેલ યુવકને બાઇકની વચ્ચે બેસાડી બેડી તરફ લઇ ગયા હતા અને ત્યાં એક ઓરડીમાં લઇ જઇ રૂ.2.50 લાખની માગ કરી હતી અને પૈસા નહી આપે તો જાનથી મારી નાખશું તેવી ધમકી આપી હતી.

યુવાનને ગ્રીનલેન્ડ ચોકડી પાસે લઈ ગયા
રમણજીએ એટીએમના ખાતામાં થોડી રકમ હશે તેમ કહેતા બંને શખ્સો તેને ફરીથી બાઇકની વચ્ચે બેસાડી ગ્રીનલેન્ડ ચોકડી તરફ પેટ્રોલ પંપ પાસેના એટીએમે લઇ ગયા હતા. પૈસા ઉપાડતી વખતે મોકો મળતા જ રમણજીએ ત્યાં હાજર લોકોને ઘટનાની જાણ કરતાં લોકોએ અનિલ અને દિલીપને ઝડપી લઇ પોલીસને જાણ કરી હતી. પોલીસે બંનેને ઉઠાવી પોલીસ મથકે લઇ ગઇ હતી.

બાઈકમાં ત્રણ અજાણ્યા શખ્સો ધસી આવ્યા હતા
યુવાને ફરિયાદમાં જણાવ્યા મુજબ તેનો મહિલા સાથે પરિચય થયા બાદ આ મહિલાએ તેની સાથે મિત્રતા કેળવી હતી અને તેને માધાપર ચોકડી ખાતે મળવા બોલાવ્યો હતો જેથી ફરિયાદી તેને મળવા માટે માધાપર ચોકડીએ ગયો હતો. જ્યાંથી મહિલાને બાઈક પર બેસાડી બેડી જવાના રસ્તે અતિથિ દેવો ભવ: હોટલ આગળ મામાસાહેબની વાડી પાસે બાઈક ઉભું રાખતા બાઈકમાં ત્રણ સવારીમાં ત્રણ અજાણ્યા શખ્સો ધસી આવ્યા હતા.

પોલીસે તપાસનો ધમધમાટ ચલાવી બે આરોપીની ધરપકડ કરી
ગાંધીગ્રામ પોલીસ સૂત્રોએ જણાવ્યું હતું કે, બંનએ કબૂલાત આપી હતી કે, અશ્વિનના કહેવાથી બંને આવ્યા હતા, અશ્વિને ઓપરેશન પૂરું થયા બાદ રૂ.10-10 હજાર આપવાની ખાતરી આપી હતી. દિલીપ ઉર્ફે દિલો અગાઉ હનીટ્રેપમાં ઝડપાઇ ચૂક્યો છે. મહિલા અને અશ્વિન હાથ આવ્યા બાદ વધુ હકીકતો બહાર આવશે.