ભાવ વધારો:સૌરાષ્ટ્રના લીંબુની નિકાસ શરૂ થતા ભાવ આસમાને

અગાઉ લીંબુ રૂ. 30ના કિલો મળતા હતા તેનો ભાવ અત્યારે યાર્ડમાં રૂ. 80 સુધી પહોંચ્યો છે. જ્યારે છૂટક માર્કેટમાં એક કિલો લીંબુનો ભાવ રૂ. 120થી પણ વધુ વસૂલવામાં આવે છે. દિલ્હીમાં લીંબુનો પાક નિષ્ફળ ગયો છે. જેને કારણે ત્યાં સૌરાષ્ટ્રના લીંબુની ડિમાન્ડ વધી છે. પરિણામે રાજકોટના લીંબુની નિકાસ દિલ્હી અને અન્ય રાજ્યોમાં વધી છે.

લીંબુની નિકાસ દિલ્હી સુધી કરવાની હોય સારી ગુણવત્તાવાળા લીંબુ યાર્ડમાં ઝડપથી ખપી જાય છે. જો કે સૌરાષ્ટ્રમાં પિયતની પૂરતી સુવિધાને કારણે આ વખતે લીંબુનો પાક સારો આવ્યો છે. પરંતુ સામે ડિમાન્ડ વધુ હોવાથી આવક ઓછી પડી રહી છે. કોરોના બાદ લોકો વિટામિન સી આપતા શાકભાજી અને ફળોનો વપરાશ લોકોએ વધાર્યો છે.જેમાં સૌથી વધુ લીંબુનો વપરાશ થાય છે. આ સિવાય હાલ ઉનાળાની સિઝન શરૂ થઈ હોવાથી ઠંડા પીણાના ધંધાર્થીઓ પણ મોટા પ્રમાણમાં ખરીદી કરી રહ્યા છે.