ચિંતાનું વધતું પ્રમાણ:સૌરાષ્ટ્ર યુનિ.ના મનોવિજ્ઞાન ભવનનો 1161 લોકો પર સર્વે, 51%ને કોરોના પછી હાયપર ટેન્શન વધ્યું

રાજકોટ3 મહિનો પહેલા
  • કૉપી લિંક
પ્રતિકાત્મક તસવીર. - Divya Bhaskar
પ્રતિકાત્મક તસવીર.
  • સતત માથાનો દુખાવો, થાક, નર્વસનેસ, છાતીમાં દુખાવો થવો હાયપર ટેન્શનના લક્ષણો

હાયપરટેન્શન માટેની જાગૃતિ માટે 17મે વર્લ્ડ હાયપર ટેન્શન ડે તરીકે મનાવવામાં આવે છે. કોરોના પછી ઘણા લોકોની માનસિકતામાં ઘણા પરિવર્તનો આવ્યા. જેમાં ચિંતા, ડિપ્રેશન, હતાશા, ડાયાબિટીસમાં પણ તેની અસર જોવા મળી. ખાસ કરીને બ્લડપ્રેશર એટલે કે હાયપર ટેન્શનની અસરો પણ જોવા મળી. જેના વિશે સૌરાષ્ટ્ર યુનિવર્સિટીના મનોવિજ્ઞાન ભવનના અધ્યક્ષ ડો. યોગેશ જોગસણ દ્વારા 1161 લોકો પર સર્વે કરવામાં આવ્યો છે. જેમાં આશરે 51% લોકોએ સ્વીકાર્યું કે કોરોના પછી તેઓને હાયપર ટેન્શનની સમસ્યાઓ અનુભવાય છે.

પ્રાથમિક હાયપર ટેન્શન
પ્રાથમિક હાયપર ટેન્શન માટે કોઈ કારણ નથી, પરંતુ અભ્યાસ દર્શાવે છે કે તે ધીમે ધીમે વિકસે છે અને જેમ ઉંમર વધે હાય પરટેન્શન જોવા મળે છે

સેકન્ડરી હાયપર ટેન્શન
ગૌણ અથવા સેકન્ડરી હાયપર ટેન્શન ઊંઘની પેટર્ન, કિડનીની સમસ્યાઓ, મૂત્રપિંડ પાસેની ગ્રંથિની ગાંઠો, થાઇરોઇડની સમસ્યાઓ, રક્ત વાહિનીઓમાં જન્મજાત ખામી, વધુ પડતી પેઇન કિલરનું સેવન, ઠંડા પીણાઓને કારણે થઈ શકે છે. કોકેઈન અને વધુ પડતા આલ્કોહોલનો ઉપયોગ ગૌણ હાયપરટેન્શનના કારણ બની રહે છે

તણાવ સૌથી અગત્યનું કારણ
જ્યારે વ્યક્તિ તણાવમાં હોય છે, ત્યારે શરીર સ્ટ્રેસ હોર્મોન, કોર્ટિસોલ ઉત્પન્ન કરે છે, જે શરીરમાં હોર્મોનલ અસંતુલનનું કારણ બને છે. એટલું જ નહીં પરંતુ અસ્થાયી ધોરણે વ્યક્તિનું બ્લડ પ્રેશર અથવા ટેન્શન પણ વધારે છે. સમય જતાં, હાઈ બ્લડ પ્રેશર વ્યક્તિના હૃદયના ધબકારા વધારી શકે છે, આથી હૃદયને ઝડપથી ધબકવું પડે છે અને હૃદય રોગનું જોખમ ઉભું થાય છે. આ ઉપરાંત, જો કોલેસ્ટ્રોલનું સ્તર ખૂબ ઊંચું હોય અથવા તેને હાઈપર કોલેસ્ટેરોલેમિયા કહેવાય, તો તે રક્તવાહિનીઓને સાંકડી થવાનું કારણ બની શકે છે.

હાયપર ટેન્શનના લક્ષણો
સતત માથાનો દુખાવો, થાક અથવા મૂંઝવણ, નર્વસનેસ, છાતીમાં દુખાવો, પેશાબમાં લોહી, ઝાંખી દ્રષ્ટિ, હાંફ ચઢવો, બેચેની લાગવી, અચાનક પરસેવો વળવો વગેરે.

સૌથી વધુ હાયપર ટેન્શન થવાની શક્યતાઓ કોને છે?
જેઓનું વધુ વજન છે, કોઈ લોહીનો સબંધી જેને હાઈ બ્લડપ્રેશર છે, વધુ મીઠું ખાવું એ હાયપર ટેન્શનને નોતરે છે, પુરતા પ્રમાણમાં ફળો અને શાકભાજી ન ખાવા, પુરતી કસરત ન કરવી, કેફીનયુક્ત પીણા પીવા, અનિયમિત જીવનશૈલી, ખોટી ચિંતા અને વારંવાર એકના એક વિચારો, એકલતા અનુભવવી, સમાયોજન ન થવું, વારંવાર બીમાર થવું, કોઈ ગંભીર બીમારી થવી અને તેના વિશેના વિચારો, તણાવ વગેરે.

નિવારણ અને સારવાર
વજન પ્રમાણસર રાખવું, નિયમિત વ્યાયામ, પૌષ્ટિક આહાર લેવો, કેફીનયુક્ત અને ચરબીયુક્ત પીણાઓ ન લેવા, ધૂમ્રપાન બંધ કરવું, મીઠું અને કેફીન ઘટાડવું, માનસિક શાંત રહેવાના પ્રયત્નો કરવા, આનંદિત રહેવું, સારો સમય પસાર કરવો, ગમતી પ્રવૃતિ કરવી, યોગ્ય સમયે ડોક્ટરની મુલાકાત લેવી.

અન્ય સમાચારો પણ છે...