ભાસ્કર ગ્રાઉન્ડ રિપોર્ટ:રૂડા અને પાણી પુરવઠા બોર્ડની એકબીજા પર ખો ની નીતિથી નવાગામના 400 પરિવારને ધરારથી પીવું પડે છે ટેન્કરનું પાણી

રાજકોટએક મહિનો પહેલાલેખક: ધીમંત જાની
  • કૉપી લિંક
નવાગામ (આણંદપર) વિસ્તારની મહિલાઓને કયારેક તો રસોઈ અધુરી મૂકીને પાણી ભરવા માટે જવું પડે છે. - Divya Bhaskar
નવાગામ (આણંદપર) વિસ્તારની મહિલાઓને કયારેક તો રસોઈ અધુરી મૂકીને પાણી ભરવા માટે જવું પડે છે.
  • પાણીની લાઈન કોણ નાખશે તે અંગે બે તંત્ર વચ્ચે સંકલનનો અભાવ: સરપંચ કહે છે ફાઈલ તાલુકા પંચાયતમાં મૂકી છે
  • મહિનાઓ બાદ પણ પાણીની લાઇન ન નખાતા 5,000 લિટરના 16 ટેન્કર દ્વારા દૈનિક 80,000 લિટર પાણીનું વિતરણ
  • ત્રણ મહિના પહેલા રજૂઆતો છતાં પાણી વિના ટળવળતી પ્રજામાં આક્રોશ

રાજકોટના પાદરમાં આવેલા નવાગામ (આણંદપર) ખાતે 50 વારિયા પ્લોટમાં રહેતા 400થી વધુ પરિવાર આજે પણ નાછૂટકે ટેન્કરનું પાણી પીવા મજબૂર બની રહ્યા છે. છેલ્લા ત્રણ મહિનાથી સતત રજૂઆતો થતી હોવા છતાં પાઇપલાઇન નાખવાની કામગીરી ન કરાતાં કાળઝાળ ઉનાળામાં ગામમાં છતી સુવિધાએ આ વિસ્તારના રહીશોને પાણી માટે ટળવળવું પડી રહ્યું છે. ભલે રાજકોટનો જ છેવાડાનો ખૂબ જ નજીકનો ભાગ હોય પરંતુ આજે પણ નવાગામમાં પાણીનું ટેન્કર જ્યારે આવે છે ત્યારે જાણે બે દાયકાઓ પૂર્વેની સુવિધાવિહીન પુરાતન ગ્રામ્ય સંસ્કૃતિની યાદ તાજી થતી હોય તેવા દૃશ્યો વચ્ચે બેડાંઓ સાથે રીતસર લાઇનો જોવા મળી રહી છે.

નવાગામ (આણંદપર) ગામમાં 35 હજારની વસ્તી છે. સરપંચ લાલજીભાઇ સોલંકી જણાવે છે કે, ‘અમારા ગામમાં વચ્ચેના ભાગમાં પૂરતું પાણી આવી રહ્યું છે. ગામમાં 3 બોર, બે કૂવા અને તંત્રનું પાણી આવી રહ્યું હોવાથી ગામને કેન્દ્રમાં પાણીની કોઇ સમસ્યા નથી, પરંતુ અમારા ગામના છેવાડાના ભાગમાં 50 વારિયા પ્લોટમાં હજુ તંત્ર દ્વારા આસાનીથી ત્યાં વસતા પરિવારો સુધી પાણી પહોંચે તેવી કોઇ વ્યવસ્થા કરવામાં આવી ન હોવાથી ત્યાં રહેતા 400 પરિવાર આજેય પાણી માટે ટેન્કરના સહારે છે.

આ વિસ્તારમાં પાઇપલાઇન નાખવા ત્રણ મહિનાથી રજૂઆતો કરીએ છીએ, નાણાપંચની ગ્રાન્ટમાંથી આ કામગીરી માટે રૂ.પાંચ લાખની રકમ ફાળવવાની તૈયારી દર્શાવી છે, તેમ છતાં કામગીરી આગળ વધતી નથી. હાલ પાણી પુરવઠા વિભાગ દ્વારા દૈનિક 5,000 લિટરના 16 ટેન્કર આવી રહ્યા છે. તાલુકા પંચાયત સ્તરે ફાઇલ મુકવાની પ્રક્રિયા થઇ ચૂકી છે, પાણી પુરવઠા વિભાગમાં પણ આ કામગીરી પૂરી કરવાનો અનુરોધ કર્યો છે, છતાં પરિસ્થિતિ આજે પણ જૈસે થૈ જેવી જ છે!’.

અધિકારીઓના ‘સરકારી’ જવાબ

  • પાણી પુરવઠા વિભાગ કહે છે કે, આ ગામ રૂડાની હદમાં આવે છે, ત્યારે આ વિસ્તારમાં પાણીની પાઇપલાઇન નાખવાની જવાબદારી રૂડાની છે.
  • રૂડાના જવાબદાર અધિકારી કહે છે કે, રૂડાની આણંદપર જૂથ યોજના પૂર્ણ થઇ ગઇ છે, પંચાયતને સોંપી દીધી છે, હવે નવા વધતા છેવાડાના વિસ્તારોમાં પાણી પહોંચાડવાની જવાબદારી ગ્રામપંચાયતની ગણાય.
  • ગામના સરપંચ કહે છે કે, અમે પંચાયતની ગ્રાન્ટમાંથી રૂ.પાંચ લાખ ફાળવવાની તૈયારી દર્શાવી છે, તાલુકા પંચાયતમાં ફાઇલ મૂકવા સંલગ્ન પ્રક્રિયા પૂર્ણ કરી દીધી છે.
  • આ તમામ બાબતો વચ્ચેની વાસ્તવિક પરિસ્થિતિ એ છે કે, રાજકોટના પાદરમાં જ નવાગામ (આણંદપર)ના છેવાડાના વિસ્તારના 400 પરિવારને નાછૂટકે ટેન્કરનું પાણી પીવું પડી રહ્યું છે.

પીવાના પાણીની પાઇપલાઇન નાખવાની જવાબદારી રૂડાની
નવાગામ (આણંદપર)ના છેવાડાના વિસ્તારમાં હાલ પાણી પુરવઠા દ્વારા 16 ટેન્કર દ્વારા પાણી પહોંચાડવામાં આવી રહ્યું છે. આ અંગે પાણી પુરવઠા બોર્ડના અધિક મદદનીશ ઇજનેર એ.બી.કવાએ ‘દિવ્ય ભાસ્કર’ને જણાવ્યું હતું કે, ‘હાલ પાણી પુરવઠાના નેતૃત્વ હેઠળ આ વિસ્તારમાં ટેન્કર શરૂ કરાયા છે, પરંતુ આ વિસ્તાર રૂડાની હદમાં આવતો હોવાથી નવાગામના આ છેવાડાના વિસ્તારમાં પાઇપલાઇન નાખવાની જવાબદારી રૂડાના શિરે છે. > અધિક મદદનીશ ઇજનેર, પા.પુ.બોર્ડ

છેવાડાના વિસ્તારમાં અમારે પાઈપલાઇન ન નાખવાની હોય
રૂરલ અર્બન ડેવલપમેન્ટ ઓથોરિટી (રૂડા)ના નાયબ કાર્યપાલક ઇજનેર વિકાસ પરમારે જણાવ્યું હતું કે, ‘નવાગામ (આણંદપર) ખાતે પાણી પહોંચાડવા માટે રૂડાએ આણંદપર પાણી પુરવઠા યોજના પૂર્ણ કરી ગ્રામપંચાયતને સોંપી દીધી છે. હવે જે છેવાડાના વિસ્તારોનું વિસ્તરણ થાય તો ત્યાં પાણી પહોંચાડવાની જવાબદારી રૂડાની નથી. નવાગામના છેવાડાના વિસ્તાર માટે પાણીની લાઇન નાખવા માટે કોઇ રજૂઆત કે દરખાસ્ત પણ આવી નથી. > નાયબ કાર્યપાલક ઇજનેર, રૂડા

અન્ય સમાચારો પણ છે...