એજ્યુકેશન:ઉત્તરવહી લઈને ભાગી જનાર વિદ્યાર્થીને 5 પરીક્ષા રદની સજા

સૌરાષ્ટ્ર યુનિવર્સિટીમાં મંગળવારે EDAC (એક્ઝામિનેશન ડિસિપ્લિનરી એક્શન કમિટી)ની મિટિંગ મળી હતી જેમાં પરીક્ષા દરમિયાન ચોરી કે ગેરવર્તણૂક કરતા વિદ્યાર્થીઓનું હિયરિંગ કરાયું હતું. આ હિયરિંગમાં કુલ 39 પૈકી માત્ર 23 વિદ્યાર્થી હાજર રહ્યા હતા અને પોતે પરીક્ષા દરમિયાન ચોરી કરી હોવાનું સ્વીકાર્યું હતું. 39 વિદ્યાર્થી પૈકી 38 વિદ્યાર્થીને 1+1 સેમેસ્ટર પરીક્ષા રદ કરવાનો નિર્ણય કરાયો હતો, જ્યારે સુરેન્દ્રનગરનો વિદ્યાર્થી ચાલુ પરીક્ષાએ ઉત્તરવહી લઇને કોલેજમાંથી ભાગી ગયો હતો તેને 1+4 પરીક્ષા રદ કરવાની સજા ફટકારાઇ છે.

વિદ્યાર્થીઓ પણ જાણે ચોરી પે સીનાજોરી કરી રહ્યા હોય એમ હિયરિંગમાં હાજર રહ્યા ન હતા. પરીક્ષામાં ચોરી કરનાર વિદ્યાર્થીઓને મંગળવારે યુનિવર્સિટીની એક્શન કમિટીએ હિયરિંગ માટે બોલાવ્યા હતા પણ તેઓ યુનિવર્સિટીનું પણ ગાંઠતા ન હોય તેમ 39માંથી માત્ર 23 જ વિદ્યાર્થી આવ્યા હતા.

યુનિવર્સિટીમાં મંગળવારે કુલપતિની અધ્યક્ષતામાં મળેલી ઈડીએસીની મિટિંગમાં બીએ, બી.કોમ, બી.બી.એ સહિતની પરીક્ષામાં ગેરરીતિ આચરતા 39 વિદ્યાર્થીને બોલાવવામાં આવ્યા હતા. આ વિદ્યાર્થીઓ મોરબી,જેતપુર, સુરેન્દ્રનગર સહિતના સેન્ટરમાંથી હાજર રહ્યા હતા. 39 વિદ્યાર્થીમાંથી 38 વિદ્યાર્થી કે જેઓ ગેરવર્તણૂક, મોબાઈલ, નોટબુક અને માઈક્રો ઝેરોક્ષમાંથી ચોરી કરતા ઝડપાયા હતા તેઓની 1+1 પરીક્ષાની સજા ફટકારવામાં આવી છે.

જ્યારે સુરેન્દ્રનગરનો એક વિદ્યાર્થી વાઢેર તક્ષિત કે જે બીએ સેમ-6ની પરીક્ષામાં આન્સરશીટ લઈને ભાગી ગયો હતો તેને 1+4ની પરીક્ષાની સજા ફટકારવામાં આવી છે. ઈડીએસીની મિટિંગમાં વિદ્યાર્થીઓના હાથ ધરાયેલા હિયરિંગમાં માત્ર 23 જ વિદ્યાર્થી હાજર રહ્યા હતા અને તમામ વિદ્યાર્થીએ પોતાની ભૂલ સ્વીકારી હતી અને તેના આધારે જ તેમને બે સેમેસ્ટર સુધી પરીક્ષા નહીં આપવા દેવાની સજા ફટકારવામાં આવી હતી.