પોલિટીકલ:રાજકોટ સહિત 6 મહાપાલિકાની ચૂંટણી ફેબ્રુઆરીમાં યોજવા તૈયારી

રાજ્યમાં રાજકોટ સહિત 6 મહાનગરપાલિકા, 31 જિલ્લા પંચાયત, 231 તાલુકા પંચાયત અને 55 નગરપાલિકાની ચૂંટણી કોરોના સંક્રમણને પગલે ત્રણ મહિના સુધી મુલતવી રાખવાનો નિર્ણય લેવાયા બાદ હવે રાજ્ય ચૂંટણી આયોગ દ્વારા આગામી ફેબ્રુઆરી માસમાં ચૂંટણી યોજવાની તૈયારીઓ શરૂ કરવામાં આવી છે.

રાજકોટ મહાનગરપાલિકાની હાલની ચૂંટાયેલી પાંખની મુદ્દત 14 ડિસેમ્બરે પૂરી થાય છે. જેથી તેમાં વહીવટદારોની નિમણૂક માટે રાજ્ય સરકાર ટૂંક સમયમાં નિર્ણય લેશે. કોરોનાની રસી ટૂંકમાં આવે તેવી શક્યતા વચ્ચે ચૂંટણી પંચે ફેબ્રુઆરીમાં કોવિડ પ્રોટોકોલ સાથે ચૂંટણીઓ યોજવાનું આયોજન કર્યું છે. આયોગે તમામ જિલ્લાના ચૂંટણી અધિકારી-કલેક્ટરો અને 6 મહાનગરપાલિકાના મ્યુનિસિપલ કમિશનરોને પત્ર લખીને કોવિડ પ્રોટોકોલ મુજબ ચૂંટણી યોજવા જે વસ્તુઓની જરૂર પડશે તે ઉપલબ્ધ કરાવવા જણાવ્યું છે. તમામ ચૂંટણી મથકો માટે થર્મલ ગન, હેન્ડ ગ્લોવ્ઝ, સેનિટાઇઝર, લિક્વિડ શોપ, પીપીઇ કિટ જેવી વસ્તુઓ પૂરી પડાશે. રાજકોટ મહાનગરપાલિકાની મુદત 14 ડિસેમ્બરે પૂરી થાય છે. ચૂંટણી ન થાય તો વહીવટદારની નિમણૂક કરવી કે હાલની ચૂંટાયેલી પાંખની મુદત લંબાવવી જેવા મુદ્દા પર વિચારણા છે પણ વહીવટદારની નિમણૂકની શક્યતા વધારે છે. મનપામાં વહિવટદારની નિમણૂક થશે તો વર્તમાન પદાધિકારીઓ અને વિરોધ પક્ષના નેતાને મળેલી કાર સહિતની સુવિધાઓ બંધ થશે.