કોરોના વાઇરસ:એકના એક ભોજનથી કંટાળેલા કોરોના દર્દી માટે ભાત બન્યા

સિવિલ હોસ્પિટલના કોરોના વોર્ડમાં દાખલ દર્દી માટે હોટેલમાંથી ભોજન આવતું હતું, એક જ સરખા મેનુને કારણે દર્દીઓ કંટાળી ગયા હતા અને રવિવારે ભોજનનો અસ્વીકાર કરતાં તંત્રવાહકોમાં દોડધામ મચી ગઈ હતી, અંતે હોસ્પિટલના મેસમાં જ દર્દીઓ માટે ભાત બનાવાયા હતા.  સિવિલ હોસ્પિટલના કોરોના વોર્ડમા દાખલ દર્દી અને નર્સિંગ સ્ટાફ માટે હોટેલમાંથી બપોર અને સાંજ બંને સમયનું જમવાનું અાવે છે, રસોઇની ગુણવત્તા બાબતે અગાઉ અનેક વખત વિવાદ થયો હતો. રવિવારે બપોરે તૈયાર ડિશ હોટેલમાંથી આવી ત્યારે દર્દીઓ અને નર્સિંગ સ્ટાફે ડિશ સ્વીકારવાનો ઇનકાર કર્યો હતો, કેટલાક દર્દીઓએ તો રસોઇની ગુણવત્તા બાબતે ફરીથી ટકોર કરી હતી અને જમવાની ના કહી દીધી હતી અને મામલો તબીબી અધિક્ષક ડો.મનીષ મહેતા સુધી પહોંચ્યો હતો.  ડો.મહેતાએ જણાવ્યું હતું કે, દર્દીઓને દરરોજ એક જ સરખું મેનુ જમવામાં મળતું હોવાથી તેઓ એક જ મેનુથી કંટાળી ગયા હોવાથી બપોરે જમવાનો ઇનકાર કર્યો હતો, જેથી દર્દીઓ અને સ્ટાફની માંગ મુજબ સિવિલના જ મેસમાં ભાત બનાવાયા હતા અને તમામને દહીં ભાત અપાયા હતા. ડો.મહેતાએ એવું પણ કહ્યું હતું કે, હોટેલ સંચાલકો સાથે વાતચીત કરવામાં આવી હતી અને દરરોજનું નવું મેનુ નક્કી કરવામાં આવી રહ્યું છે જેમાં અઠવાડિયામાં એકાદ દિવસ મીઠાઇ અને ફરસાણ પણ અપાશે.