પ્રારંભ:રાજકોટના જામનગર રોડ પર માધાપર ચોકમાં ST બસ સ્ટોપ બનાવાયું, જામનગર, મોરબી અને જુનાગઢ રૂટની 70 બસની ટ્રીપ શરૂ

ઢેબર રોડ ખાતેના બસપોર્ટ પરથી સમગ્ર રૂટની બસનું સંચાલન શરૂ થયા બાદ ટ્રાફિકના કારણે મુસાફરોની મુશ્કેલીમાં વધારો થયો છે. મુસાફરોની મુશ્કેલીને ધ્યાનમાં રાખી આજથી કામચલાઉ બસ સ્ટેન્ડ માધાપર ખાતે શરૂ કરી દેવામાં આવ્યું છે. જેમાં 5 પ્લેટફોર્મ ઊભા કરવામાં આવ્યા છે અને જામનગર, મોરબી અને જુનાગઢ રૂટની 70 ટ્રીપની બસ અહીંથી જ ઉપાડવામાં આવી રહી છે..

પાકા પાયે બસ સ્ટોપ બનાવવામાં દોઢ વર્ષ નીકળી જશે
આ બસ સ્ટેન્ડ પરથી જૂનાગઢ, મોરબી અને જામનગર રૂટની 70 બસ ઉપડશે અને અહીં સ્ટોપ થશે. જેમાં જામનગર તરફની 37 ટ્રીપ, જૂનાગઢ તરફની 25 ટ્રીપ અને મોરબી રૂટની 8 ટ્રીપ બસની ઉપડશે. વધુમાં એસ.ટી.વિભાગના નિયામક યોગેશ પટેલના જણાવ્યા અનુસાર હાલ અહીં 5 પ્લેટફોર્મ બનાવવામાં આવ્યા છે. જ્યારે પાકા પાયે બસ સ્ટેન્ડ બનવામાં અંદાજિત દોઢ વર્ષનો સમય નીકળી જશે.

મુસાફરોને હાલાકી પડ્યાના દ્રશ્યો જોવા મળ્યાં
બસ સ્ટેન્ડમાં પૂછપરછ ઓફિસ, વિદ્યાર્થી અને મુસાફરો માટે પાસની સુવિધા, પેસેન્જર માટે વેઈટિંગ એરિયાની સુવિધા કરવામાં આવી છે. જો કે બસ સ્ટેન્ડ ખાતેના દ્રશ્યો કંઇક અલગ જોવા મળ્યા હતા. અહીં કેટલીક બસ ઉભી ન રહેતા મુસાફરો રસ્તા પર ઉભા નજરે પડ્યા હતા અને માહિતીના અભાવના કારણે હાલાકી ભોગવી રહ્યા હતા.