મિલન:બસ ચૂકી જતા MPનું દંપતી વિખૂટું પડી ગયું, પતિ બસમાં બેસી ગયો અને મહિલા મંદિરે પહોંચી ગઇ

મૂળ એમ.પી.ના વતની અને હાલ રાજકોટમાં રહીને મજૂરીકામ કરતું દંપતી પોતાના લગ્ન બાદ પહેલીવાર પોતાના વતન જઈ રહ્યું હતું. બંને લોકો બસમાં જતા હતા. બસમાં બેઠા બાદ પતિ નાસ્તો લેવા માટે નીચે ઉતર્યો હતો. ત્યારબાદ મહિલા વોશરૂમ જવા માટે પોતાના પતિને જાણ કર્યા વગર બસમાંથી નીચે ઉતરી હતી.આ સમયગાળા દરમિયાન બસ ઉપડી જતા મહિલા બસ ચૂકી ગઇ હતી.

મહિલાએ ઘરે જવા માટે રિક્ષા કરી પરંતુ તેને પોતાના ઘરનું એડ્રેસ ખબર નહીં હોવાથી તે રસ્તામાં મંદિર આવતા તેને રિક્ષા ઊભી રખાવીને પોતે મંદિરે ઉતરી ગઇ હતી.મહિલા મંદિરે એકલી બેઠી હોવાની જાણ 181ની ટીમને થતા કાઉન્સિલર તૃપ્તિબેન પટેલ અને તેની ટીમ પહોંચી હતી. મહિલા સાથે વાતચીત કરી. યુવતીએ પોતાના પતિનો નબંર આપ્યો તે સ્વિચ ઓફ આવતો હતો. પરિવારજનોની શોધખોળ કરી મહિલાને તેના બહેનના ઘરે મૂકવામાં આવી છે.