ગાંધીધામમાં તપાસ પૂર્ણ:આઈટીની તપાસમાં 63 કરોડના વ્યવહારો ખુલ્યા

મુંબઈ સ્થિત ગુટખા બનાવતી કંપનીનું કનેક્શન ગાંધીધામ સુધી ખૂલતા રાજકોટ ઇન્કમટેક્સે તપાસ હાથ ધરી હતી. આ તપાસમાં રૂ.63 કરોડના બોગસ વ્યવહારો મળી આવ્યા છે. તેમજ રૂ.13 લાખની રોકડ અને રૂ. 7 કરોડના દાગીના જપ્ત કરાયા છે. ગાંધીધામમાં એક સપ્તાહ સુધી તપાસ ચાલુ રહી હતી અને તપાસ દરમિયાન જે શંકાસ્પદ વ્યવહારો મળી આવ્યા હતા તે કબજે લેવામાં આવ્યા છે અને તેનો રિપોર્ટ મુંબઈ મોકલાયો છે.

મુંબઈના કનેક્શનમાં ગાંધીધામની આર.બી.એન્ટરપ્રાઈઝ, એસ.કે નિર્યાત નામની કંપનીમાં રાજકોટ ઈન્કમટેક્સે તપાસ શરૂ કરી હતી. ચકાસણી કરતા એવું જાણવા મળ્યું છે કે, આઇટીસી મેળવવા માટે કંપનીએ બોગસ વ્યવહારો કર્યા હતા. એ માટેનો ક્લેમ મેળવે તે પહેલા જ તે ઈન્કમટેક્સની તપાસમાં બહાર આવી ગયું હતું. અનેક શહેરોમાં આ કંપનીની શાખા હોવાનું બહાર આવ્યું છે. તપાસમાં રાજકોટ, ગાંધીધામ ઉપરાંત મુંબઈની ટીમ જોડાઈ હતી.