રશિયા-યુક્રેન યુદ્ધની અસર:સ્ટેશનરીના ભાવમાં 25%નો વધારો, A-4 સાઇઝ કાગળમાં રૂ.35, બોલપેનમાં 3થી 5નો ભાવવધારો, વાલીઓ પર બોજો વધ્યો

રાજકોટ2 મહિનો પહેલા
  • રો-મટીરિયલ મળતું નથી, હાલ કાગળની સંપૂર્ણપણે અછત
  • ટેક્સ્ટ બુક અને નોટ બુકના ભાવમાં વધારો નોંધાયો છે

રશિયા અને યુક્રેન વચ્ચે છેલ્લા બે માસથી ભીષણ યુદ્ધ ચાલી રહ્યું છે. આ યુદ્ધની અસર વિશ્વભરના દેશો પર પડી રહી છે. મેટલ સહિતની વસ્તુઓના ભાવમાં મોટો વધારો નોંધાયો છે. ત્યારે આ ભાવવધારાની અસર સ્ટેશનરી પર પણ પડી છે. ગત વર્ષની તુલનાએ ચાલુ વર્ષે સ્ટેશનરીની વસ્તુઓમાં 20થી 25 ટકાનો વધારો થયો છે. A-4 સાઈઝ કાગળમાં 35, બોલપેનમાં 3થી 5 રૂપિયાનો ભાવવધારો નોંધાયો છે, જેને લઈને વાલીઓ પર ખર્ચનો બોજો વધ્યો છે.

રો-મીટિરિયલ ન મળવાનું મુખ્ય કારણ
રાજકોટમાં નેમીનાથ એન્ટરપ્રાઇઝના નામથી વર્ષોથી સ્ટેશનરીનો વેપાર કરતા પ્રતીક સંઘાણીએ જણાવ્યું હતું કે રશિયા-યુક્રેન યુદ્ધની નકારાત્મક અસર સ્ટેશનરીનાં ધંધા પર પણ પડી છે. છેલ્લા ત્રણ મહિનામાં તબક્કાવાર 10થી 25 ટકાનો ભાવવધારો નોંધાયો છે, જેનું મુખ્ય કારણ રો-મટીરિયલ મળતું નથી, હાલ કાગળની સંપૂર્ણપણે અછત છે. સ્ટેશનરીની અનેક વસ્તુઓમાં વપરાતા લોખંડની પણ અછત જોવા મળી રહી છે. ચીનથી જે વસ્તુઓ આવતી હતી એનું પ્રમાણ પણ ઘટ્યું છે. રશિયા અને યુક્રેનના યુદ્ધની અસર વિવિધ વસ્તુઓની સપ્લાય પર પડતા ભાવ આસમાને પહોંચ્યા છે.

ટેક્સ્ટ બુક અને નોટ બુકના ભાવમાં વધારો થયો.
ટેક્સ્ટ બુક અને નોટ બુકના ભાવમાં વધારો થયો.

ભાવવધારો થતાં લોખંડની અછત
તેમણે વધુમાં જણાવ્યું હતું કે અગાઉ બાળકની સ્ટેશનરી માટે વાલીઓને વાર્ષિક રૂ. 2 હજાર જેટલો ખર્ચ કરવો પડતો હતો, જેમાં હાલના સમયમાં 20થી 25% જેટલો વધારો છે. ઉપરાંત ટ્રાન્સપોર્ટેશન પણ મોંઘું થતાં એની અસર બાળકના અભ્યાસ પર જોવા મળી રહી છે. સ્ટેશનરીની વાત કરીએ તો એમાં બોલપેન સહિતની અનેક વસ્તુઓમાં લોખંડનો મોટા પ્રમાણમાં ઉપયોગ થતો હોય છે. હાલ લોખંડના ભાવમાં વધારો થવાથી અને એની અછત સર્જાતાં આવી તમામ વસ્તુઓ મોંઘી થઈ છે.

બાળકોની ટેક્સ્ટ બુક અને નોટ બુકમાં પણ વધારો થયો.
બાળકોની ટેક્સ્ટ બુક અને નોટ બુકમાં પણ વધારો થયો.

જેટલું રો-મટીરિયલ આવે એ ઓછું પડે છે
બીજી તરફ, કાગળની પણ અછત જોવા મળી રહી છે અને જેટલું રો-મટીરિયલ આવે એ ઓછું પડે છે. એડવાન્સ રકમ આપવા છતાં રો-મટીરિયલ મળતું નથી, જેની સીધી અસર બાળકોની ટેક્સ્ટ બુક અને નોટ બુકના ભાવોમાં જોવા મળી રહી છે. એમાં પણ 25 ટકા જેટલો વધારો નોંધાયો હોવાનું પ્રતીક સંઘાણીએ સ્વીકાર્યું હતું.

સ્ટેશનરીની તમામ વસ્તુઓ પર ભાવવધારો ઝીંકાયો.
સ્ટેશનરીની તમામ વસ્તુઓ પર ભાવવધારો ઝીંકાયો.

સ્ટેશનરી પર યુદ્ધનું ગ્રહણ લાગ્યું
ઉલ્લેખનીય છે કે રશિયા-યુક્રેન યુદ્ધને કારણે અનેક વસ્તુઓના ભાવમાં વધારો નોંધાયો છે. કેટલીક વસ્તુઓ રૂપિયા આપવા છતાં પણ ન મળતી હોવાનો ઘાટ ઘડાયો છે. ત્યારે સ્ટેશનરી જેવી બાળકોનાં અભ્યાસ માટેની જરૂરી વસ્તુને પણ આ યુદ્ધનું ગ્રહણ લાગ્યું છે. એને લઈને વાલીઓને ભારે હાલાકીનો સામનો કરવો પડી રહ્યો છે. જોકે યુદ્ધ તો કદાચ થોડા મહિનાઓ બાદ પૂરું થશે, પરંતુ સ્ટેશનરીના ભાવોમાં પાછો ઘટાડો આવશે કે કેમ એ કહેવું મુશ્કેલ છે.

અન્ય સમાચારો પણ છે...