વિરોધ પ્રદર્શન:રાજકોટમાં 'આપ'ના કાર્યકરોએ ‘પાટીલ તેરી ગુંડાશાહી નહીં ચલેગી’ના સુત્રોચ્ચાર કર્યા, સુરતમાં સામાન્ય સભામાં આપના કોર્પોરેટરોની અટકાયતનો વિરોધ

બે દિવસ પહેલા સુરત મહાનગરપાલિકામાં આમ આદમી પાર્ટીના 27 કોર્પોરેટરો દ્વારા સુરત મહાનગર પાલિકાની બજેટની સામાન્ય સભા ઓનલાઈન રાખતા વિપક્ષ આમઆદમી પાર્ટી દ્વારા વિરોધ કરવામાં આવ્યો હતો. વિરોધ કરતા જ આપના કોર્પોરેટરની અટકાયત કરવામાં આવી હતી. જેના પડઘા રાજકોટમાં પડ્યા છે. રાજકોટમાં આમ આદમી પાર્ટી દ્વારા શહેરમાં ભાજપ અધ્યક્ષ સી.આર. પાટીલના બેનર સાથે વિરોધ દર્શાવવામાં આવ્યો હતો. જેમાં કાર્યકરોએ પાટીલ તેરી ગુંડાશાહી નહીં ચલેગી નહીં ચલેગીના સુત્રોચ્ચાર કર્યા હતા.

સામાન્ય સભામાં વિપક્ષની ભૂમિકા મહત્વની- આપ
આ અંગે આમ આદમી પાર્ટીના કાર્યકરોએ જણાવ્યું હતું કે,સંસદ અને ગુજરાત વિધાનસભા ઓફલાઈન ચાલી રહી છે. પ્રજાના પ્રશ્નો માટે વિધાનસભા અને સંસદમાં ધારાસભ્યો અને સંસદ સભ્યો ચર્ચા કરી રહ્યા છે પરંતુ સુરત મહાનગરપાલિકાની મહત્વની એવી બજેટની સામાન્ય સભા પણ શાસકોએ ઓનલાઇન રાખી છે. જેનો વિપક્ષ દ્વારા આક્રમક વિરોધ કર્યો છે.સામાન્ય સભામાં વિપક્ષની ભૂમિકા મહત્વની હોય છે. જેને સત્તાધારી પક્ષ દ્વારા દબાવવામાં આવતા આજે વિરોધ નોંધાવવામાં આવ્યો હતો.

પાટીલ તેરી તાનાશાહીના સુત્રોચ્ચાર કર્યા
રાજકોટમાં આમ આદમી પાર્ટીના કાર્યકરો મોટી સંખ્યામાં એકત્રિત થયા હતા અને સી.આર. પાટીલના ફોટા સાથેના બેનર હાથમાં પકડ્યા હતા. તેમજ પાટીલ તેની તાનાશાહી નહીં ચલેગી નહીં ચલેગી, ઇન્કલાબ ઝીંદાબાદના નારા લગાવ્યા હતા. આ વિરોધ પ્રદર્શન ઉગ્ર બને તે પહેલા જ પોલીસ દ્વારા કાર્યકરોની અટકાયત કરવામાં આવી હતી.