કૃષિ બિલનો વિરોધ:ભારત બંધના એલાનની કલાકો પહેલા પેડક રોડ પર કોંગ્રેસે ટાયર સળગાવ્યાં

કૃષિ બિલના વિરોધમાં ખેડૂતોએ મંગળવારે ભારત બંધનું એલાન આપ્યું છે, ત્યારે સોમવારે રાત્રે જ રાજકોટના પેડક રોડ પર કોંગી આગેવાનો અને તેના સાથી કાર્યકરોએ ટાયર સળગાવી વિરોધ દર્શાવતા મંગળવારે બંધના એલાન વખતે ઘર્ષણ થવાનાં એંધાણ વર્તાઇ રહ્યા છે. પોલીસે આરોપી કોંગી આગેવાનને દારૂ પીધેલી હાલતમાં પકડી લીધો હતો.

મંગળવારે ભારત બંધના એલાનને પગલે રાજકોટમાં કોઇ અનિચ્છનીય બનાવ બને નહીં તે માટે શહેરમાં ચુસ્ત પોલીસ બંદોબસ્ત ગોઠવવામાં આવ્યો છે, પોલીસે કેટલાક આગેવાનોને અગાઉથી રાઉન્ડઅપ કરી લીધા છે ત્યારે સોમવારે રાત્રે 10.30 વાગ્યાના અરસામાં પેડક રોડ પર બાલક હનુમાન મંદિર પાસે કેટલાક શખ્સોએ ટાયર સળગાવી કૃષિ બિલનો વિરોધ કર્યો હતો.

ટાયર સળગાવ્યાની ઘટનાની જાણ થતાં પોલીસ તંત્રમાં દોડધામ મચી ગઇ હતી. પોલીસ પહોંચી તે પહેલા વિરોધ કરનારા નાસી ગયા હતા. બી.ડિવિઝન પોલીસ સ્ટેશનના પીઆઇ અસુરાએ જણાવ્યું હતું કે, કોંગ્રેસના આગેવાન તુષાર નંદાણીને ઉઠાવી લઇ તેની પૂછપરછ શરૂ કરવામાં આવી છે અને તેની સાથેના ત્રણ-ચાર લોકોની શોધખોળ શરૂ કરવામાં આવી છે.