સુરક્ષામાં વધારો:રાજકોટ રેલવે સ્ટેશન પર હાઇટેક સુરક્ષા, સામાન સ્કેન કરવા માટે 2 મશીન મુકવામાં આવ્યા, બુધવારથી કાર્યરત થશે

રાજકોટએક વર્ષ પહેલા
  • એક મશીન 200 કિલો અને બીજુ મશીન 170 કિલોના વજન સુધીની વસ્તુનું સ્કેન કરશે

રેલવે સ્ટેશન પર સુરક્ષા હવે હાઇટેક બની ગઈ છે. રેલવે સ્ટેશનની સલામતી અને સુરક્ષા માટે સ્ટેશન પરિસરમાં 2 બેગ સ્કેનર મશીનો લગાવવામાં આવ્યા છે. આ પ્રતિબંધિત વસ્તુઓ સ્ટેશન પર જતા અટકાવશે. રાજકોટ વિભાગના સિનિયર DCM અભિનવ જેફનાં જણાવ્યા મુજબ સ્ટેશનના મુખ્ય પ્રવેશદ્વાર પર પ્રથમ મશીન અને બીજું મશીન બુકિંગ ઓફિસના ગેટ પર લગાવવામાં આવ્યું છે.

મશીન ચલાવવા માટે RPFના જવાનોને તાલીમ આપવામાં આવી
પ્રથમ મશીનની ક્ષમતા એક સમયે 200 કિલો સુધીના વજન વાળી વસ્તુને સ્કેન કરવાની છે અને તેની કિંમત લગભગ 25 લાખ છે. બીજા મશીનની ક્ષમતા એક સમયે 170 કિલો સુધીના વજનવાળા વસ્તુને સ્કેન કરવાની છે અને તેની કિંમત આશરે 13.57 લાખ રૂપિયા છે. તે મુસાફરોના સામાન અને બેગ સ્કેન સાથે રાખશે. જ્યારે મુસાફરો ગેટ પાસે પહોંચે છે, ત્યારે તેમણે સામાનની તપાસ કરવી પડશે. મશીન ચલાવવા માટે RPFના જવાનોને તાલીમ આપવામાં આવી છે.

બુધવારથી મશીન સંપૂર્ણ રીતે કાર્યરત થઈ જશે
તાલીમ આપ્યા બાદ આ મશીન આગામી બુધવારથી સંપૂર્ણ રીતે કાર્યરત થઈ જશે. આ મશીનો ઉપરાંત, સુરક્ષા વ્યવસ્થાને વધુ મજબુત બનાવવા માટે, 22 હેન્ડ હેલ્ડ મેટલ ડિટેક્ટરની પણ ડિવિઝનના મહત્વના સ્ટેશનો પર માંગ કરવામાં આવી છે. તેમ તંત્રની સત્તાવાર યાદીમાં જણાવાયું છે.