અમૂલના પ્લાન્ટને લીલી ઝંડી:રાજકોટના ગઢકામાં સરકારે 100 એકર જમીન ફાળવી, સૌરાષ્ટ્રમાંથી 25 લાખ લીટર દૂધના ઉપયોગથી પાઉડર તૈયાર કરાશે

રાજકોટ22 દિવસ પહેલા
  • કૉપી લિંક
રાજકોટ ડેરીના ચેરમેન ગોરધન ધામેલીયા અને અધિકારીઓ દ્વારા સ્થળ મુલાકાત લેવામાં આવી હતી. - Divya Bhaskar
રાજકોટ ડેરીના ચેરમેન ગોરધન ધામેલીયા અને અધિકારીઓ દ્વારા સ્થળ મુલાકાત લેવામાં આવી હતી.

રાજકોટ જિલ્લામાં વિકાસ માટેના નવા દ્વાર ખૂલ્યા હોય તેમ રાજ્ય સરકારે રાજકોટની ભાગોળે ગઢકા નજીક ટોચની સહકારી ડેરી ‘અમૂલ’ને પ્લાન્ટ સ્થાપવા માટે 100 એકર જમીનની ફાળવણી કરી દીધી છે. આજે રાજ્ય કેબીનેટની બેઠકમાં આ દરખાસ્તને બહાલી આપી દેવામાં આવી હતી. આ અંગેની સત્તાવાર જાહેરાત રાજકોટ ડેરીના ચેરમેન ગોરધન ધામેલિયાએ કરી છે. તેઓએ જણાવ્યું છે કે, સૌરાષ્ટ્રમાંથી 25 લાખ લીટર દૂધનો આ પ્લાન્ટમાં ઉપયોગ થશે અને દૂધનો પાઉડર તૈયાર કરવામાં આવશે.

110 એકર જમીન ફાળવણીની દરખાસ્ત કરાઇ હતી
દેશભરમાં સહકારી ડેરીમાં ટોચનું સ્થાન ધરાવતી અમૂલ દ્વારા રાજકોટ નજીક નવા પ્લાન્ટ સ્થાપવા માટે જમીનની માગણી કરવામાં આવી હતી. જિલ્લા કલેક્ટર દ્વારા જુદી-જુદી સરકારી ખરાબાની જમીનોની ઓળખ કરવાની કામગીરી થઇ હતી અને છેવટે અમૂલ દ્વારા ગઢકા પાસેની જમીનમાં રસ લેવામાં આવ્યો હતો. સહકારી ડેરી દ્વારા રાજકોટ જિલ્લા કલેક્ટરને વિધિવત રીતે ગઢકા પાસેની 110 એકર જમીન ફાળવવાની દરખાસ્ત કરવામાં આવી હતી. જેના આધારે કલેક્ટરે વેલ્યુએશન નક્કી કરીને મંજૂરી માટે ફાઈલ સરકારને મોકલી દીધી હતી. આજે રાજ્ય સરકારની કેબીનેટ બેઠકમાં આ દરખાસ્તને બહાલી આપી દેવામાં આવી હતી.

અમૂલ બે પ્લાન્ટ ઉભા કરશે
55 એકર જમીન ગઢકાની વીડીની બાજુમાં આવેલી છે જ્યારે 45 એકર જમીન ગઢકા-ઢાંઢણી રોડ પરની છે. આ બંને જગ્યાએ અમૂલ દ્વારા બે જુદા-જુદા પ્લાન્ટ ઉભા કરવામાં આવનાર છે. એક જગ્યાએ પનીર પ્લાન્ટ અને બીજી જગ્યાએ દૂધ પ્રોસેસિંગ પ્લાન્ટ ઉભો કરવાની દરખાસ્ત છે. સરકાર દ્વારા વેલ્યુએશન રિપોર્ટની ચકાસણી કરીને આખરી મંજૂરી આપવામાં આવી હતી.

રાજકોટ જિલ્લામાં વિકાસના નવા દ્વાર ખૂલશે
વેલ્યુએશનમાં તંત્ર દ્વારા આસપાસની 1 કિલોમીટરની જમીનનો સરવે કરીને જંત્રી ભાવના આધારે કિંમત નક્કી કરવામાં આવતી હોય છે. જિલ્લા વહીવટી તંત્ર દ્વારા સરકારને મોકલાયેલી દરખાસ્તમાં 1800થી 1900ના ભાવ સૂચવવામાં આવ્યા હતા. ઉલ્લેખનીય છે કે, અમૂલને જમીન ફાળવણી ફાઈનલ થઇ જવાને પગલે હવે રાજકોટ જિલ્લામાં વિકાસના નવા દ્વારો ખુલી શકે છે અને નવી-નવી કંપનીઓ પ્લાન્ટ સ્થાપવા માટે રસ લઇ શકે છે.

અન્ય સમાચારો પણ છે...