ક્રાઇમ:ગોંડલમાં ગૌ સેવકોએ ગાયો ભરેલી ટ્રક પકડી, કતલખાને જતી આઠ ગાયો અને બે વાછરડાના જીવ બચાવ્યા

ગાયોને મધરાત્રે કતલખાને લઈ જવાના બનાવ અવારનવાર સામે આવે છે. આવી જ એક ઘટના ગોંડલમાં બની હતી. ગત રાત્રે ગોંડલનાં ગૌરક્ષક ગોપાલભાઇ ટોળીયાને ગાયો ભરેલી ટ્રક રાજકોટથી ગોંડલ નેશનલ હાઇવે તરફ કતલખાને લઇ જવાતી હોવાની બાતમી મળી હતી. જેના આધારે તેમણે ગાયો ભરેલી ટ્રક પકડી હતી અને કતલખાને જતી આઠ ગાયો અને બે વાછરડાના જીવ બચાવ્યા હતા.

ગૌ સેવકોએ ટ્રકનો પીછો કરી ટ્રકને રોક્યો હતો
બાતમીને આધારે ગૌ સેવકોની સાથે ગોપાલભાઇ ટોળીયાએ ચોરડી ગામ પાસે વોચ ગોઠવી હતી. ત્યાંથી ગાયો ભરેલી ટ્રક પસાર થતા ગોપાલભાઈ ટોળીયા, મુકેશભાઈ ભાલાળા, ભુપતભાઈ બતાળા, વિશાલભાઈ પુરોહિત સહિતના ગૌ સેવકોએ ટ્રકનો પીછો કર્યો હતો. બાદમાં ગોડલ આશાપુરા ચોકડી પાસે ગાયો ભરેલી ટ્રકને રોકી તેમાં તપાસ કરતા આઠ ગાયો અને બે વાછરડા મળી આવ્યા હતા.
ગાયોને ભરૂચ મોકલવામાં આવી રહ્યાંનું ખુલ્યું
આ ઘટનાની જાણ સ્થાનિક પોલીસને થતા તાત્કાલિક પોલીસ ઘટનાસ્થળે આવી ગઇ હતી અને ટ્રકનો કબ્જો મેળવ્યો હતો. જ્યાં ગૌવંશને મુક્ત કરાવી ગૌશાળામાં મોકલવાની કાર્યવાહી હાથ ધરાઇ હતી. પોલીસે ડ્રાઇવરની પૂછપરછ કરતા ટ્રકમાં રહેલી ગાયો અને ગૌવંશ માણાવદરથી ભરૂચ મોકલી રહ્યાનું જણાવ્યું હતું.

(હિમાંશુ પુરોહિત,ગોંડલ)