છેતરપિંડી:RTGSની ખોટી રસીદનો ફોટો મોકલાવી રાજકોટના વેપારી સાથે રૂ.17.70 લાખની ઠગાઈ, તામિલનાડુની કંપની સામે ફરિયાદ

શહેરના ભાવનગર રોડ, ચુનારાવાડ-6માં રહેતા અનિલ બિજલભાઇ ડાભી નામના વેપારી યુવાને તામિલનાડુના ઇરોડ ગામે આવેલી ગ્લોબલ કંપનીના પવિત્રાબેન, મેનેજર જાહીરભાઇ, એમ.ડી. સોદરાજભાઇ સામે છેતરપિંડી કર્યાની પોલીસમાં ફરિયાદ નોંધાવી છે. ફરિયાદ મુજબ, યુવાન ઘર નજીક જ ડાભી ફૂડ એન્ડ એગ્રોના નામની દુકાન ધરાવે છે.

દરમિયાન ગત તા.2-6ના રોજ ઉપરોક્ત આરોપીઓએ મોબાઇલ મારફતે કોન્ટેક્ટ કર્યો હતો. બાદમાં આરોપીઓએ ત્રણ ટન ગાયના ઘીની ખરીદી કરવાની વાત કરી હતી. જેથી તેમને સેમ્પલ મોકલ્યું હતું જે સેમ્પલની ખરાઇ કર્યા બાદ આરોપીઓએ સેમ્પલની રકમ આરટીજીએસથી મોકલી હતી. બાદમાં ત્રણ ટન ગાયના ઘીના  રૂ.17,70,233 કેનરા બેંકમાં આરટીજીએસ કર્યાની રસીદ મોકલાવી હતી. જો કે તે ખોટી નીકળી હતી. આથી થોરાળા પોલીસમથકમાં ફરિયાદ નોંધાઈ છે.