ભાસ્કર એક્સક્લૂઝિવ:નિશ્ચિત પ્લેસમેન્ટ, ઉંચા પેકેજ, વર્ક ફ્રોમ હોમને કારણે કમ્પ્યૂટર એન્જિનિયરિંગ વિદ્યાર્થીઓની પહેલી પસંદ, IT ઇજનેરી બીજા ક્રમે

રાજકોટએક મહિનો પહેલા
  • કૉપી લિંક
ફાઈલ તસ્વીર - Divya Bhaskar
ફાઈલ તસ્વીર
  • ધો.12 સાયન્સના વિદ્યાર્થીઓમાં ઈજનેરીમાં શેનો ક્રેઝ છે તેનું એક્સપર્ટે કર્યું વિવરણ: 26 હજાર વિદ્યાર્થી સામે ઈજનેરીમાં 65 હજાર બેઠક
  • આ વર્ષે 12 સાયન્સના વિદ્યાર્થીઓની ઈજનેરીમાં પસંદગી અનુક્રમે કમ્પ્યૂટર, IT, મિકેનિકલ, બાયોટેક્નોલોજી રહેશે

ધોરણ 12 સાયન્સના ‘એ’ તથા ‘બી’ ગ્રૂપનું પરિણામ જાહેર થઈ ચૂકયું છે. લગભગ 26 હજારની આસપાસ ‘એ’ ગ્રૂપના વિદ્યાર્થીઓ ઉત્તીર્ણ થયા છે અને 65 હજારથી વધુ એન્જિનિયરિંગની બેઠકો ઉપલબ્ધ છે. વિદ્યાર્થીઓ અને વાલીઓને મૂંઝવતો પ્રશ્ન છે કે કઈ યુનિવર્સિટીમાં, કઈ કોલેજમાં, કઈ બ્રાંચમાં એડમિશન લેવું?

આ વર્ષે પણ કમ્પ્યુટર એન્જિનિયરિંગ તથા ઈન્ફોર્મેશન ટેક્નોલોજી તરફ વિદ્યાર્થીઓનો પ્રવાહ રહેશે. નિશ્ચિત પ્લેસમેન્ટ, ઊંચું પેકેજ, વર્ક ફ્રોમ હોમ, વ્હાઈટ કોલર જોબ, ઓફિસ વર્ક વગેરેને કારણે કમ્પ્યુટર એન્જિનિયરિંગમાં તથા આઈ.ટી. તરફ વિદ્યાર્થી તથા વાલીઓનો ઝુકાવ રહેશે. કમ્પ્યુટર, આઈટીમાં અભ્યાસ માટે મેથ્સ ખૂબ સારું હોવું જરૂરી છે.

ત્યારબાદ મિકેનિકલ એન્જિનિયરિંગમાં પણ સ્પાર્ક જોવા મળી રહ્યો છે. સૌરાષ્ટ્ર - કચ્છ તથા ખાસ કરીને રાજકોટ, મિકેનિકલ એન્જિનિયરિંગનું હબ હોવાને કારણે ‘’આત્મનિર્ભર ભારત’’, ‘’મેક ઈન ઈન્ડિયા’’ અભિયાનને કારણે, સ્વરોજગાર ઉદ્યોગ વેપાર નોકરીની ઉજ્જવળ તકો હોવાને કારણે, કમ્પ્યુટર તથા આઈટીને સમકક્ષ મિકેનિકલ એન્જિનિયરિંગમાં તકો ઉપલબ્ધ છે. ટૂંકમાં આ વર્ષે ધોરણ 12 વિજ્ઞાનપ્રવાહના વિદ્યાર્થીઓ તથા વાલીઓની પસંદગી અનુક્રમે કમ્પ્યુટર, આઈટી, મિકેનિકલ, બાયોટેક્નોલોજી, સિવિલ, કેમિકલ ઈ.સી, ઈલેક્ટ્રિકલ રહેશે.

એક્સપર્ટ વ્યૂ: કેમિકલ, મિકેનિકલ અને ઇલેક્ટ્રોનિક્સ ઈજનેરી પણ આવી રીતે ઉપયોગી થશે- ડો. નવનીત ઘેડિયા, એન્જિનિયરિંગ શિક્ષણના નિષ્ણાત

  • કમ્પ્યુટર- આઈટીનું હબ પૂના, હૈદરાબાદ, બેંગલોર છે.
  • રિલાયન્સ, એસ્સાર જામનગરમાં હોવાને કારણે તથા અંકલેશ્વર-સુરત બાજુ કેમિકલની મોટી ઈન્ડસ્ટ્રી હોવાને કારણે કેમિકલ એન્જિનિયરિંગમાં પણ તકો ઉપલબ્ધ છે. સમજવાની જરૂર છે કે ઉદ્યોગ જગતને તમામ બ્રાંચના સારા એન્જિનિયરોની જરૂર છે. કમ્પ્યુટર - આઈટીના સમન્વયરૂપ ઈલેક્ટ્રોનિકસ એન્ડ કોમ્યુનિકેશન એન્જિનિયરિંગમાં ઈલેક્ટ્રોનિક્સ તથા સોફ્ટવેરના સમન્વયને કારણે ઈસરો, પીઆરએલ, આઈપીઆર જેવી કંપનીઓમાં ઉજ્જવળ ભવિષ્ય છે.
  • એન્જિનિયરિંગની મૂળભૂત બ્રાંચ એટલે મિકેનિકલ, ઈલેક્ટ્રિકલ, સિવિલ અને કેમિકલ, પાવર સપ્લાય સિસ્ટમ, ઈલેક્ટ્રિકલ વ્હીકલ, સોલાર સિસ્ટમ, રીન્યુએબલ એનર્જી તથા સમગ્ર વિશ્વમાં જ્યારે એનર્જી વિના એક ડગલું પણ માંડી શકાય નહીં ત્યારે ઈલેક્ટ્રિકલ એન્જિનિયરિંગ પણ એક શ્રેષ્ઠ વિકલ્પ છે.
  • સરકારની ઈલેક્ટ્રોનિક્સ ક્ષેત્રે આત્મનિર્ભર બનવા માટે સેમિકન્ડક્ટર અને ચિપ્સ મેન્યુફેક્ચરિંગ માટે 76000 કરોડના ફંડની જોગવાઈ કરી છે તે ઉપરાંત 5 જી ટેક્નોલોજીને કારણે પણ આ બ્રાન્ચને ખુબ જ વેગ મળશે.

કોરોનાએ બાયોટેક્નોલોજીની ઉપયોગિતા સાબિત કરી છે
સૌથી અગત્યની વાત છે બાયોટેક્નોલોજી એન્જિનિયરિંગની. કોરોનાએ બાયોટેકનોલોજીની ઉપયોગિતા સાબિત કરી દીધી છે. કમ્પ્યુટર,આઈટી,મિકેનિકલ સમકક્ષ બાયોટેક્નોલોજીમાં ઉજ્જવળ ભવિષ્યની તકો છે. એબી તથા એબી ગ્રૂપના તમામ વિદ્યાર્થીઓ બાયોટેક્નોલોજી એન્જિનિયરિંગમાં પ્રવેશ મેળવી શકશે. રિસર્ચમાં જવા ઈચ્છુક વિદ્યાર્થીઓ માટે બાયોટેક્નોલોજીમાં ઉજ્જવળ ભવિષ્ય છે.

ઓટોમોબાઈલના 80% ટકા પાર્ટસ રાજકોટમાં બને છે
ઓટોમોબાઈલમાં 80% ટકા પાર્ટસ રાજકોટમાં બને છે. ઈલેક્ટ્રિકલ વ્હીકલ માટે પણ મિકેનિકલ એન્જિનિયરોની જરૂર પડશે. ઈન્ફ્રાસ્ટ્રક્ચરમાં હરણફાળ વિકાસને કારણે કમ્પ્યુટર, આઈટી, મિકેનિકલ બાદ સિવિલ એન્જિનિયરિંગ તરફ પણ અમુક વિદ્યાર્થીઓ વળશે તેમ એન્જિનિયરિંગના તજજ્ઞોએ જણાવ્યું હતું.

અન્ય સમાચારો પણ છે...