બેઠક:કોરોના સંક્રમણને અટકાવવા નિયમિત રીતે વ્યાયામ કરો, ખેલાડીઓ સાથે વેબિનાર

કોરોના સંક્રમણ સામે ખેલાડીઓએ પ્રકૃતિ અને ક્ષમતા અનુસાર નિયમિત વ્યાયામ કરી શારીરિક ક્ષમતા ટકાવી રાખવા ગુજરાત યુનિવર્સિટીના શારીરિક શિક્ષણ નિયામક ડો.ભાગવતસિંહ વનારે શારીરિક તંદુરસ્તી અને માનસિક સુખાકારી વિષય પર યોજાયેલા વેબિનારમાં જણાવ્યું હતું. સ્વર્ણિમ ગુજરાત સ્પોર્ટસ યુનિવર્સિટીએ મંગળવારે સોશિયલ મીડિયાના માધ્યમથી પરિસંવાદ યોજાયો હતો. 
આ વેબિનારમાં શિક્ષણ મંત્રી ભૂપેન્દ્રસિંહ ચુડાસમા, રમતગમત મંત્રી ઇશ્વરસિંહ પટેલના માર્ગદર્શન હેઠળ અગ્રસચિવ સી.વી.સોમ,  અંજુ શર્મા અને સ્પોર્ટસ યુનિવર્સિટીના કુલપતિ ડો.અર્જુનસિંહ રાણા જોડાયા હતા. એટલું જ નહીં રાજ્યની વિવિધ યુનિવર્સિટીના કુલપતિ, પ્રાધ્યાપકો, વિદ્યાર્થીઓ સહિતનાઓ મોટી સંખ્યામાં સાંપ્રત સમયના કોરોના સંકટ લોકડાઉન પરિસ્થિતિમાં પોતાનું વિસ્તૃત જ્ઞાન આપ્યું હતું. સ્પોર્ટસ યુનિવર્સિટીના આ વેબિનારની પ્રશંસા કરતા શિક્ષણ વિભાગના અગ્ર સચિવ અંજુ શર્માએ વર્તમાન પરિસ્થિતિનો સ્વીકાર કરી નકારાત્મક પરિસ્થિતિને સકારાત્મક તરફ પોતાની મનોસ્થિતિનો વિસ્તાર કરવા અનુરોધ કર્યો છે.
સોશિયલ મીડિયા થકી પદવીદાન સમારોહ: ડો.રાણા
સ્વર્ણિમ ગુજરાત સ્પોર્ટસ યુનિવર્સિટીનાં કુલપતિ ડો.અર્જુનસિંહ રાણાએ રાજયમાં સૌ પ્રથમ વખત ટેક્નોલોજી તથા સોશિયલ મીડિયાના માધ્યમથી પદવીદાન સમારોહ યોજવાની જાહેરાત કરી છે. જેમાં વિવિધ વિદ્યાશાખાઓના વિદ્યાર્થીઓને પદવી એનાયત કરવામાં આવશે.