ફરિયાદ:પીવાના પાણીમાં ગટરનું પાણી આવ્યું

વોર્ડ નં.16ના અનેક વિસ્તારમાં છેલ્લા કેટલાક દિવસોથી પીવાના પાણી સાથે ગટરનું પાણી આવતું હોવાની ફરિયાદ સ્થાનિક લોકોએ પૂર્વ કોર્પોરેટર્સની આગેવાનીમાં રજૂઆત કરી હતી. ડેપ્યુટી મ્યુનિ. કમિશનર નંદાણીને કરેલી રજૂઆતમાં જણાવ્યું હતું કે, વોર્ડ નં.16માં દૂષિત અને ગંધાતા પાણી સાથે ઇયળો પણ નીકળી રહી છે. જેના કારણે અહીં રહેતા લોકોના આરોગ્ય પર જોખમ ઊભું થાય તેમ છે. આ વિસ્તારમાં પીવાના પાણી સાથે ગટરનું ગંદું પાણી આવતું હોવાની પણ અનેક વખત રજૂઆત કરવામાં આવી છે, પરંતુ કોર્પોરેશનના અધિકારીઓએ આ પ્રશ્ન હલ કરવા કોઇ પગલાં લીધા નથી. આ ઉપરાંત વોર્ડ નં.16માં છેલ્લા છ માસથી અપૂરતા ફોર્સથી પાણી આવતું હોવાથી લોકોને પૂરતું પાણી મળતું નથી. જે અંગેની રજૂઆત ડેપ્યુટી મ્યુનિસિપલ કમિશનરને કરવામાં આવી હતી.