ચૂંટણી:જિલ્લા પંચાયતની ચૂંટણીમાં આજથી દાવેદારી થશે, રાજકોટ જિલ્લામાં 9.42 લાખ મતદાર

રાજકોટ જિલ્લા પંચાયત, તાલુકા પંચાયત અને ગોંડલ નગરપાલિકાની ચૂંટણી માટે ફોર્મ ઉપાડવાની શરૂઆત સોમવારથી થનારી છે. તા.8થી 13 તારીખ દરમિયાન ફોર્મની કાર્યવાહી થશે અને 15મીએ ફોર્મની ચકાસણી થશે. જિલ્લા પંચાયત અને તાલુકા પંચાયતની ચૂંટણી માટે એક જ મતદાન મથક રહેશે અને મતદારે બંને પંચાયત માટે રાખેલા અલગ અલગ ઈવીએમમાં મત આપવાનો રહેશે.રાજકોટ જિલ્લા પંચાયત અને તમામ 11 તાલુકા પંચાયતમાં 9.42 લાખ મતદાર નોંધાયા છે.

જેમાં સૌથી વધુ મતદારો ગોંડલ તાલુકામાં 1.40 લાખ છે તેમજ સૌથી ઓછા મતદારો જામકંડોરણામાં 59133 છે. આ સિવાય ગોંડલ નગરપાલિકામાં 88738 મતદાર નોંધાયા છે અને તે ચૂંટણી માટે ગોંડલ પ્રાંત અધિકારી અને મધ્યાહ્ન ભોજનના નાયબ કલેક્ટરને આર.ઓ. બનાવાયા છે. જિલ્લા પંચાયતની 36 સીટ અને 11 તાલુકા વચ્ચે 8 ચૂંટણી અધિકારીની નિમણૂક કરાઈ છે.