કુલસચિવને રજૂઆત:સૌરાષ્ટ્ર યુનિ.માં ભાજપના 6 સેનેટ સભ્યોની માર્ચ મહિનાની પેન્ડિંગ બેઠક કુલપતિ બોલાવે તેવી માગ

સૌરાષ્ટ્ર યુનિવર્સિટીમાં કુલપતિ સામેનો ભાજપના જ સભ્યોનો મોરચો હવે ખરાખરીના જંગ સ્વરૂપ બન્યો છે. સેનેટ ઈલેક્શન જાહેર ન કરતા કુલપતિ સામે ખુદ ભાજપના જ સભ્યો સામે પડ્યા છે. ત્યારે હવે ખાસ સેનેટની જેમ સિન્ડિકેટની બેઠક બોલાવવા માટે ભાજપી સભ્યોએ સહી કરી કુલસચિવને રજૂઆત કરી VC બેઠક બોલાવે તેવી માગ કરી છે.

3 ફેબ્રુઆરી બાદ એકપણ બેઠક મળી નથી
ભાજપના સિન્ડિકેટ સભ્ય ભાવિન કોઠારી, નેહલ શુક્લ, ભરત રામાનુજ, મહેશ ચૌહાણ અને રાજેશ કાલરિયાની સહી સાથે અને પ્રવીણસિંહ ચૌહાણના નામ સાથે કુલસચિવને રજૂઆત થઇ છે. જેમાં જણાવવામાં આવ્યું છે કે, સ્ટેચ્યુટ 81 મુજબ દર મહિને સિન્ડિકેટ બેઠક મળવી જોઈએ. જોકે ગત 3 ફેબ્રુઆરીના રોજ બેઠક મળી તે બાદ કાર્યકારી કુલપતિ ડો.ગિરીશ ભિમાણીએ 6 ફેબ્રુઆરીના રોજ ચાર્જ લીધો. પછી એક પણ વખત સિન્ડિકેટની બેઠક મળી નથી. આથી તાત્કાલિક સિન્ડિકેટની બેઠક બોલાવવામાં આવે તેવી માગ છે.

સહી અભિયાનથી સિન્ડિકેટ સભ્ય મેહુલ રૂપાણી દૂર રહ્યા
ગુનેગારોને ચૂંટણી ન લડવા દેવા ઘડાયેલા સ્ટેચ્યુટ 187ને રદ કરવા માટે ભાજપ-કોંગ્રેસના 21 સભ્યોએ ખાસ સેનેટ બોલાવવા સહી અભિયાન કર્યું હતું. જેની તારીખ હજુ જાહેર થઇ નથી.ત્યાં સિન્ડિકેટ બેઠક બોલાવવા માગ થઇ છે. જોકે ઉપરોક્ત બંને સહી અભિયાનથી સિન્ડિકેટ સભ્ય મેહુલ રૂપાણી દૂર રહ્યા છે.