તપાસ:50 કરોડના ફુલેકા પ્રકરણમાં SITની રચના કરતા CP

શહેરમાં રોકાણકારોને ઊંચા વ્યાજની લાલચ આપી કરોડો રૂપિયા ઓળવી જઇ ફુલેકું ફેરવનાર મંડળીઓના કૌભાંડની ઘનિષ્ઠ તપાસ માટે સ્પે.ઇન્વેસ્ટિગેશન ટીમની રચના કરવામાં આવી છે. શહેરના અસંખ્ય રોકાણકારોની મરણમૂડી સમાન કરોડો રૂપિયા ઓળવી જનાર ત્રણ મંડળીઓના કૌભાંડની ઊંડાણપૂર્વક તપાસ થાય તે માટે અને આગામી દિવસોમાં આવા કૌભાંડો ન બને તેની તકેદારીના ભાગ રૂપે પોલીસ કમિશનરે શહેર પોલીસમાં નોંધાતા જીપીઆઇડી એક્ટ-2003 હેઠળના ગુનાઓ માટે સીટની રચના કરવામાં આવી છે. જેમાં ઝોન-2ના ડીસીપી એમ.એન. જાડેજા, પશ્ચિમ વિભાગના એસીપી પી.કે.દિયોરા, ક્રાઇમ બ્રાંચના પીઆઇ વી.કે.ગઢવીનો સમાવેશ કરાયો છે.

યુનિવર્સિટી રોડ પોલીસમાં નોંધાયેલા ગુનામાં પકડાયેલા આશિષ ક્રેડિટ સોસાયટીના પ્રદીપ ડાવેરા, દિવ્યેશ કાલાવડિયા અને હિતેષ લુક્કાની વિશેષ પૂછપરછ કરવા શનિવારે 14 દિવસના રિમાન્ડની માગણી સાથે કોર્ટમાં રજૂ કર્યા હતા. જ્યાં અદાલતે ત્રિપુટીના 10 દિવસના રિમાન્ડ મંજૂર કરી પોલીસ હવાલે કરાયા હતા.